वीरगंज भन्सार कार्यालयले चालु आर्थिक वर्षको असोज महिनामा निर्धारित लक्ष्यभन्दा बढी राजस्व सङ्कलन गरेको छ । कार्यालयले असोजमा २६ अर्ब ७२ करोड ५८ लाख रुपैयाँ राजस्व सङ्कलन गरेको हो ।
कार्यालयले असोज महिनाका लागि २६ अर्ब ४६ करोड रुपैयाँ राजस्व सङ्कलन गर्ने लक्ष्य निर्धारण गरेको थियो । निर्धारित लक्ष्यभन्दा २६ करोड ५८ लाख रुपैयाँ बढी राजस्व सङ्कलन भएको प्रमुख भन्सार प्रशासक कृष्णप्रसाद मैनालीले जानकारी दिए ।
उनका अनुसार असोज महिनामा इन्धन आयातबाट मात्रै दुई अर्ब २९ करोड रुपैयाँ राजस्व प्राप्त भएको छ । त्यसैगरी, खाना पकाउने एलपी ग्यासको आयातबाट एक अर्ब ८० करोड रुपैयाँ, अलकत्रा (बिटुमिन) आयातबाट एक अर्ब ४० करोड रुपैयाँ तथा स्याउ र नासपाती आयातबाट ५० करोड रुपैयाँ राजस्व सङ्कलन भएको छ ।
कार्यालयका अनुसार चालु आर्थिक वर्षको असोज महिनासम्ममा कुल ७० अर्ब ५६ करोड रुपैयाँ राजस्व सङ्कलन गर्ने लक्ष्य रहेको थियो । तर, उक्त अवधिमा ६९ अर्ब १३ करोड रुपैयाँ मात्रै राजस्व सङ्कलन भएको छ ।
यसअनुसार असोज महिनामा लक्ष्यभन्दा बढी राजस्व सङ्कलन भए पनि चालु आर्थिक वर्षको पहिलो दुई महिनासहितको समग्र अवधिमा भने लक्ष्यअनुसार राजस्व सङ्कलन हुन सकेको छैन । असोजसम्मको कुल राजस्व सङ्कलन लक्ष्यभन्दा एक अर्ब ४३ करोड रुपैयाँ कम छ ।
चाडपर्वका समयमा आयात तथा व्यापारिक गतिविधिमा हुने वृद्धिले असोज महिनाको राजस्व सङ्कलनमा सकारात्मक प्रभाव पारेको बताइएको छ ।
