सशस्त्र प्रहरी बलले पर्साका विभिन्न स्थान तथा सीमा क्षेत्रबाट ४४ लाख रुपैयाँभन्दा बढी मूल्यका अवैध सामान बरामद गरेको छ । साथै, तिहार तथा छठ पर्वलाई लक्षित गरी भारतबाट अवैध रूपमा भित्र्याइएका करिब ३ लाख रुपैयाँ बराबरका प्रतिबन्धित पटाका नियन्त्रणमा लिएर नष्ट गरिएको सशस्त्र प्रहरीले जनाएको छ ।
सशस्त्र प्रहरी बल नेपाल नम्बर १३ गण पर्साका अनुसार आइतबार जिल्लाका विभिन्न स्थानीय तह तथा सीमा क्षेत्रमा खटिएका टोलीले भन्सार छली गरी ल्याइएका कपडा, कस्मेटिक, किराना सामान, मोबाइल पार्टपुर्जा, औषधि, मोटर पार्ट्सलगायत सामग्री बरामद गरेका हुन् ।
प्रहरीका अनुसार ७ लाख १० हजार ५२० रुपैयाँ बराबरका कपडा, कस्मेटिक तथा किराना सामान विभिन्न सवारीसाधनमा लोड गरी भन्सार छली गरेर नेपालतर्फ ल्याइँदै गर्दा बरामद गरिएको हो ।
यसैगरी, शुक्रबार बिन्दवासिनी गाउँपालिका–५ प्रसौनीभाठ्ठास्थित सशस्त्र प्रहरी बलको बोर्डर आउट पोस्ट (बीओपी) प्रसौनीभाठ्ठाबाट खटिएको टोलीले १८ लाख ४१ हजार ५०० रुपैयाँ बराबरका मोबाइल पार्टपुर्जा बरामद गरेको थियो । बा६३प ६८१५ नम्बरको मोटरसाइकलमा लोड गरी ल्याइँदै गरेको अवस्थामा उक्त सामग्री नियन्त्रणमा लिइएको सशस्त्र प्रहरीले जनाएको छ ।
सोही बीओपीबाट परिचालित अर्को टोलीले ५९ हजार ४० रुपैयाँ बराबरका कपडा तथा मोटर पार्ट्ससमेत बरामद गरेको थियो ।
बरामद गरिएका अवैध सामान आवश्यक कारबाहीका लागि वीरगंज भन्सार कार्यालयमा बुझाइएको सशस्त्र प्रहरीले जनाएको छ ।
चाडपर्वको समयमा सीमावर्ती क्षेत्रबाट प्रतिबन्धित पटाका तथा अन्य अवैध सामग्रीको ओसारपसार हुन सक्ने भएकाले सशस्त्र प्रहरीले सीमा क्षेत्रमा निगरानी बढाएको जनाएको छ । तिहार तथा छठलाई लक्षित गरी भारतबाट अवैध रूपमा भित्र्याइएका करिब ३ लाख रुपैयाँ बराबरका प्रतिबन्धित पटाका नियन्त्रणमा लिएर नष्ट गरिएको पनि प्रहरीले जनाएको छ ।
सशस्त्र प्रहरीले सीमा क्षेत्रमा हुने चोरीपैठारी नियन्त्रण तथा अवैध सामानको ओसारपसार रोक्न निगरानी र गस्तीलाई निरन्तरता दिएको जनाएको छ ।
