तेस्रो संस्करणको नेपाल प्रिमियर लिग (एनपीएल) मा चितवन राइनोजले विराटनगर किंग्सलाई ८ रनले पराजित गरेको छ । चितवनले दिएको १५८ रनको लक्ष्य पछ्याएको विराटनगर १९ ओभर ३ बलमा १४९ रनमा समेटिएपछि चितवनले रोमाञ्चक जित निकालेको हो ।
चितवनको जितमा बलर कमलसिंह ऐरी नायक बने । उनले ४ ओभरमा २६ रन खर्चेर ४ विकेट लिए। रिजन ढकालले पनि २ विकेट लिए भने रञ्जित कुमार, मौसम ढकाल, टम टेलर र डान मोस्लीले एक–एक विकेट हात पारे ।
विराटनगरलाई जितका लागि अन्तिम ३ ओभरमा २१ रन आवश्यक थियो। तर, १८औँ ओभरमा कमलसिंह ऐरीले लगातार दुई विकेट लिएपछि खेलको अवस्था फेरियो । उनले रुपेश सिंह र प्रतिश जिसीलाई कुनै रन नजोड्दै पभेलियन फर्काए। त्यसपछि १९औँ ओभरमा रिजन ढकालले थप दुई विकेट लिएपछि विराटनगरको जित्ने सम्भावना समाप्त भयो ।
विराटनगरका लागि ओपनर इम्रान शेखले सर्वाधिक ३९ रन बनाए। आन्द्रे रसेलले आक्रामक ब्याटिङ गर्दै १७ बलमा एक चौका र चार छक्कासहित ३३ रन जोडे। लोकेश बमले १४ बलमा २६ रन बनाए ।
त्यस्तै, बसिर अहमदले १३, एन्जेलो म्याथ्युजले १४ र चरिथ असलंकाले ८ रन बनाए। रसेलले आक्रामक ब्याटिङ गर्दै विराटनगरलाई जितको नजिक पुर्याए पनि चितवनका बलरले अन्तिम ओभरमा उत्कृष्ट प्रदर्शन गर्दै टोलीलाई जित दिलाए ।
यसअघि त्रिवि क्रिकेट मैदानमा टस हारेर पहिले ब्याटिङ गरेको चितवन राइनोजले निर्धारित २० ओभरमा ३ विकेट गुमाएर १५७ रन बनाएको थियो ।
चितवनका ओपनर डाविड मलानले सर्वाधिक ७० रन बनाए । उनले ५१ बलको सामना गरे। मलानले पहिलो विकेटका लागि देव खनालसँग ५८ रनको साझेदारी गरेका थिए। देवले १५ बलमा १२ रन बनाए ।
विकेटकिपर ब्याटर अर्जुन साउद ९ बलमा ३ रन बनाएर आउट भए। उनलाई एन्जेलो म्याथ्युजले सन्दीप लामिछानेको हातबाट क्याच गराएका थिए ।
त्यसपछि रवि बोपारा र डान मोस्लीले चितवनको इनिङ्स सम्हाले। दुवैले तेस्रो विकेटका लागि ६७ रनको अविजित साझेदारी गरे। रवि ३२ रन र डान २९ रनमा अविजित रहे ।
यसैबीच, आजको दोस्रो खेलमा जनकपुर बोल्ट्स र कर्णाली याक्सबीच प्रतिस्पर्धा हुनेछ ।
