पर्साको धोबिनी गाउँपालिका–५ मा ६२ वर्षीया लखरजिया देवीको हत्या गरी नगद तथा गरगहना लुटेको आरोपमा पक्राउ परेका तीन जनालाई पर्सा जिल्ला अदालतले पुर्पक्षका लागि थुनामा राख्न आदेश दिएको छ ।
थुनछेक बहसपछि अदालतले धोबिनी गाउँपालिका–५ का २१ वर्षीय चन्दनकुमार पटेलसहित १७ र १५ वर्षका दुई बालकलाई पुर्पक्षका लागि थुनामा राख्ने आदेश दिएको हो ।
मुद्दामा जाहेरवालाका तर्फबाट जिल्ला सरकारी न्यायाधिवक्ता आनन्द न्यौपाने तथा अधिवक्ताहरू केसी लामिछाने, आकाश महतो, औरन्जेब अहमद र मेराज अन्सारीले बहस गरेका थिए ।
गत असोज ५ गते बिहान करिब ८ बजे लखरजिया देवी आफ्नै घरको दोस्रो तलास्थित बीचको कोठामा मृत अवस्थामा फेला परेकी थिइन् । घटनाको प्रकृति शंकास्पद देखिएपछि प्रहरीले अनुसन्धान अघि बढाएको थियो ।
प्रहरीको प्रारम्भिक अनुसन्धानअनुसार तीनै जना असोज ४ गते राति चोरी गर्ने योजनासहित वृद्धाको घरमा प्रवेश गरेका थिए । उनीहरू घरको पछाडिपट्टिको बाटो हुँदै माथिल्लो तलामा पुगेका थिए। त्यसपछि झ्यालको ग्रिलको ढोका तोडेर घरभित्र पसेको प्रहरी अनुसन्धानबाट खुलेको छ ।
घरभित्र प्रवेश गरेपछि उनीहरूले अर्को कोठामा राखिएको टिनको बाकसको ताला फुटाउन थालेका थिए । सोही क्रममा तल्लो तलामा सुतिरहेकी लखरजिया देवी आवाज सुनेर माथिल्लो तलामा पुग्दा उनीहरूले चोरी गरिरहेको देखेको प्रहरीको भनाइ छ ।
प्रहरीका अनुसार चोरी गरिरहेको अवस्थामा देखेपछि तीनै जनाले वृद्धाको हत्या गरी घरमा रहेको नगद तथा गरगहना लिएर फरार भएका थिए ।
घटनाको अनुसन्धानपछि प्रहरीले तीनै जनालाई पक्राउ गरी कानुनी कारबाही अघि बढाएको थियो। अदालतको आदेशसँगै उनीहरू मुद्दाको अन्तिम फैसला नआएसम्म पुर्पक्षका लागि थुनामा रहनेछन् ।
