पर्साको जिराभवानी गाउँपालिकाकी उपाध्यक्ष रेखा चौधरीलाई सार्वजनिक अतिक्रमण हटाउन तथा प्रदूषण नियन्त्रणमा सक्रिय भूमिका निर्वाह गरेको भन्दै सम्मान गरिएको छ ।
युवा समाज सेढवाका अगुवा युवा नेता कृष्णप्रसाद चौधरीको नेतृत्वमा गाउँपालिका कार्यालय पुगेको युवाहरूको टोलीले उपाध्यक्ष चौधरीलाई दोसल्ला ओढाएर सम्मान गरेको हो । नागरिकप्रति उत्तरदायी भएर जनहितका काम गरेको भन्दै युवा समाजले उनको प्रशंसा गरेको छ ।
सेढवास्थित खेलकुद मैदानमा भएको अतिक्रमण हटाउन नेतृत्वदायी भूमिका निर्वाह गर्नुका साथै जिराभवानी गाउँपालिका–५ मा सञ्चालित लक्ष्मी पोल्ट्री फार्मका कारण स्थानीय बासिन्दाले सास्ती खेप्नुपरेपछि उक्त फार्म बन्द गराउन पहल गरेको भन्दै उनलाई सम्मान गरिएको युवा समाजले जनाएको छ ।
सम्मान कार्यक्रमका क्रममा युवा समाजले उपाध्यक्ष चौधरीलाई आगामी दिनमा अझ ऊर्जाशील भएर जनहितका काममा सक्रिय रहन आग्रह गर्दै सफल कार्यकालको शुभकामनासमेत व्यक्त गरेको थियो ।
कार्यक्रममा युवा नेता कृष्णप्रसाद चौधरी, महादेव महतो, कपिलदेव गौरोलगायतको उपस्थिति रहेको थियो ।
