नेपाल प्रिमियर लिग (एनपीएल) को तेस्रो संस्करणमा काठमान्डु गोर्खाज आफ्नो पहिलो खेलमा जनकपुर बोल्ट्सविरुद्ध ११५ रनमै समेटिएको छ । त्रिवि क्रिकेट मैदानमा टस जितेर पहिले ब्याटिङ गरेको काठमान्डुले १९ ओभर ३ बलमा सबै विकेट गुमाउँदै ११५ रन बनाएको हो ।
काठमान्डुलाई सस्तैमा समेट्न जनकपुरका आइकोनिक खेलाडी राहुल यादवले उत्कृष्ट बलिङ गरे । उनले चार ओभरमा ३१ रन खर्चेर चार विकेट लिए। राहुलले काठमान्डुका दुवै ओपनर साम हिजलेट र स्मित पटेलसहित कप्तान करण केसी तथा मोहम्मद आदिल आलमलाई आउट गरे ।
जनकपुरका लागि सैफ हसनले दुई विकेट लिए भने मोइन अली, कप्तान हर्मीत सिंह र ललित राजवंशीले एक–एक विकेट हात पारे ।
ब्याटिङतर्फ काठमान्डुका भीम सार्कीले सर्वाधिक ३३ रन बनाए। उनले २९ बलमा चार चौका प्रहार गरे। तर, काठमान्डुले खेलभर ठूलो साझेदारी बनाउन सकेन ।
६ रन हुँदा ओपनर साम हिजलेटलाई गुमाएको काठमान्डुले १९ रनको अवस्थामा हरिशंकर शाहको विकेट गुमायो। साम एक रनमा र हरिशंकर नौ रनमा आउट भए ।
त्यसपछि पनि काठमान्डुको विकेट पतन रोकिएन । रसिद खानले १७, स्मित पटेलले १३ र सुमित महर्जनले १० रन बनाए । कप्तान करण केसी आठ रनमा, जहानदाद खान पाँच रनमा र रिपोन मोन्डल नौ रनमा आउट भए। मोहम्मद आदिल आलम पहिलो बलमै एलबीडब्ल्यूको सिकार बने। शाहब आलम चार रनमा अविजित रहे ।
काठमान्डुले टोलीमा अनुबन्ध गरेका अस्ट्रेलियाली खेलाडी डेभिड वार्नर भने पहिलो खेलमा अनुपस्थित छन्। उनी आइतबार मात्रै नेपाल आउने बताइएको छ । यस खेलमा काठमान्डुले औपचारिक रूपमा अनुबन्धको घोषणा नगरेका रिपोन मोन्डल र जहानदाद खानलाई मैदानमा उतारेको छ ।
यता, जनकपुरले यसअघि पहिलो खेल खेलेका जिम्मी निशमलाई भने यस खेलमा बेन्चमा राखेको छ ।
