तिहार सकिएसँगै तराई–मधेसमा छठ पर्वको तयारी र चहलपहल सुरु भएको छ । छठ पर्व नजिकिएसँगै पूजासामग्री किनमेलदेखि नदी, पोखरी तथा तलाउको सरसफाइ र छठीघाट सजावटको काम तीव्र पारिएको छ ।
कार्तिक शुक्ल पक्षको चतुर्थी तिथिदेखि विधिवत् सुरु हुने छठ पर्व सप्तमी तिथिको बिहानसम्म चार दिन मनाइन्छ। भोजपुरी, अवधी, बज्जिका र मैथिली भाषी हिन्दू समुदायको प्रमुख पर्वका रूपमा रहेको छठ यस वर्ष कात्तिक २९ गते आइतबार परेको छ ।
छठ पर्वका लागि आवश्यक पूजासामग्री, प्रसाद, भाँडाकुँडा, कपडा तथा अन्य सामग्रीको किनमेल सुरु भइसकेको छ । छठको मुख्य पूजा नदी, पोखरी, तलाउलगायत जलाशयको किनारमा हुने भएकाले ती स्थानको सरसफाइ र सजावटमा पनि स्थानीयवासी जुटेका छन् ।
छठ पर्वको मुख्य दिन षष्ठी तिथिमा साँझ अस्ताउँदो सूर्य र सप्तमी तिथिको बिहान उदाउँदो सूर्यलाई अर्घ्य दिएर पूजा आराधना गरिन्छ । यसका लागि छठीघाटका रूपमा प्रयोग हुने जलाशयहरूलाई सफा गरी आकर्षक ढङ्गले सजाउने काम भइरहेको छ ।
पछिल्लो दुई दशकयता वीरगञ्जमा छठीघाटको सरसफाइ र सजावटमा विशेष प्रतिस्पर्धा देखिँदै आएको छ । वीरगंजको घडिअर्वा पोखरी, रानीघाटस्थित सिर्सिया नदी, छपकैया पोखरी, स्विमिङ पुल, नगवा पोखरी, मुर्ली पोखरी, पिपरा, रामगढवा, सिर्सिया र अलौँलगायतका स्थानमा रहेका जलाशयलाई छठीघाटका रूपमा सजाउन थालिएको छ ।
आकर्षक टेन्ट, पण्डाल र झिलिमिली बत्तीले छठीघाट सजाउन स्थानीयस्तरमा गठन भएका छठ पूजा व्यवस्थापन समितिहरूले लाखौँ रुपैयाँ खर्च गर्दै आएका छन् । नेपालमै प्रसिद्ध छठघाटमध्ये एक मानिने वीरगञ्जको घडिअर्वा पोखरी पार्कमा पनि अहिले सजावटको काम तीव्र गतिमा भइरहेको छ ।
घडिअर्वा छठघाटको सजावट तथा व्यवस्थापनमा यस वर्ष करिब २० लाख रुपैयाँभन्दा बढी खर्च हुने अनुमान गरिएको छठ पूजा व्यवस्थापन समितिका अध्यक्ष राकेश साह कानुले जानकारी दिए । उनका अनुसार छठघाटमा टेन्ट, पण्डाल, फूल तथा बत्तीको सजावटका लागि भारतबाट कालीगढसमेत बोलाइएको छ ।
यता, वीरगञ्ज बजारमा पनि छठको चहलपहल बढेको छ । छठ पूजाका लागि आवश्यक सामग्री, वस्त्र, फलफूल, तेल, मसला तथा खाद्यान्नका पसलमा ग्राहकको भीड देखिन थालेको छ ।
वीरगञ्जको घण्टाघर आसपास सडक किनारमा राखिएका अस्थायी पसलमा समेत छठका सामग्री किन्नेहरूको भीड लागेको छ। पर्साको पर्सागढीकी अमरावती देवीले छठका लागि आवश्यक सामग्री केही दिनअगावै किनेर राख्दा खर्च कम हुने र पूजाको समयमा हुने हतारोबाट बच्न सकिने बताइन् ।
‘अहिले नै सबै सामानको जोरजाम गरियो भने छठ पूजाका बेला त्यति धेरै धपेडी हुँदैन, पूजाकै अरू काममा समय दिन पाइन्छ,’ उनले भनिन् ।
छठ पर्वमा व्रतालु तथा परिवारका अन्य सदस्यले नयाँ लुगा लगाउने परम्परा रहेकाले रेडिमेड कपडा पसल र डिपार्टमेन्ट स्टोरहरूमा समेत ग्राहकको चाप बढेको छ ।
छठ नजिकिँदै जाँदा बजारमा किनमेल, घाट व्यवस्थापन र सरसफाइको चहलपहल थप बढ्ने देखिएको छ । धार्मिक आस्था, पारिवारिक एकता र सामाजिक सद्भावको प्रतीक मानिने छठ पर्वको स्वागतका लागि यतिबेला तराई–मधेसका बस्तीहरू उत्सवमय बन्न थालेका छन् ।
