काठमाडौं । तिहार नजिकिएसँगै बजारमा भाइमसलाको किनमेल बढेको छ । भाइटीकालाई लक्षित गर्दै चालु आर्थिक वर्षको पहिलो तीन महिनामै तीन अर्ब रुपैयाँभन्दा बढीको भाइमसला (ड्राई फ्रुट्स) आयात भएको छ । आयात बढेसँगै बजारमा यसको कारोबार चहलपहल बढेको छ भने अधिकांश भाइमसलाको मूल्यसमेत महँगिएको छ ।
व्यापार प्रवर्द्धन तथा निकासी केन्द्रका अनुसार चालु आर्थिक वर्ष २०८३/८४ को साउनदेखि असोजसम्म ३ अर्ब ७ करोड ५३ लाख २३ हजार रुपैयाँ बराबरको १ करोड ७८ लाख ११ हजार ९६६ किलो भाइमसला आयात भएको छ । उक्त आयातबाट सरकारले १ अर्ब ३७ करोड रुपैयाँभन्दा बढी राजस्व संकलन गरेको छ ।
केन्द्रको तथ्यांकअनुसार सबैभन्दा बढी ८४ करोड ७७ लाख रुपैयाँ बराबरको सुपारी आयात भएको छ । त्यस्तै, ६५ करोड ३९ लाख रुपैयाँको ओखर, ५८ करोड ७५ लाख रुपैयाँको नरिवल, ४७ करोड ९३ लाख रुपैयाँको बदाम र ४६ करोड ५७ लाख रुपैयाँ बराबरको काजु आयात भएको छ । यसबाहेक पेस्ता, खजुर तथा अन्य ड्राई फ्रुट्ससमेत विभिन्न मुलुकबाट आयात हुने गरेका छन् ।
तिहारमा भाइटीकाका दिन दिदीबहिनीले दाजुभाइलाई ओखर, काजु, बदाम, किसमिस, नरिवल, छोकडा र सुपारीलगायतका परिकार दिने परम्परा छ । यही कारण अन्य समयको तुलनामा तिहारमा ड्राई फ्रुट्सको माग र खपत बढी हुने गरेको छ ।
यसैबीच, तिहार नजिकिएसँगै काठमाडौंको नयाँ सडकस्थित मखनगल्लीका मसला पसलमा ग्राहकको चहलपहल बढेको छ । तर, भाइमसलाको मूल्य भने गत वर्षको तुलनामा महँगिएको व्यवसायीहरूले बताएका छन् । उनीहरूका अनुसार यस वर्ष अधिकांश भाइमसलाको मूल्य प्रतिकिलो १५० देखि २०० रुपैयाँसम्म बढेको छ ।
हाल बजारमा काजु प्रतिकिलो १ हजार ८०० देखि २ हजार २०० रुपैयाँ, किसमिस ७०० देखि ७५० रुपैयाँ र पेस्ता ३ हजार ७०० देखि ३ हजार ७५० रुपैयाँमा बिक्री भइरहेको छ ।
त्यस्तै, बदाम प्रतिकिलो १ हजार ८०० रुपैयाँ, ओखर ५५० देखि ६०० रुपैयाँ, ल्वाङ १ हजार ९०० रुपैयाँ र सुकमेल ७ हजार रुपैयाँ पुगेको छ । मिश्री प्रतिकिलो १८० देखि २०० रुपैयाँ, दालचिनी ७५० रुपैयाँ तथा अन्जिर १ हजार ८०० देखि २ हजार रुपैयाँसम्ममा कारोबार भइरहेको व्यवसायीहरूले बताएका छन् ।
तिहारमा भाइमसलाको खपत अन्य समयको तुलनामा बढी हुने भएकाले व्यापारसमेत बढ्न थालेको छ । तर, आयात मूल्य बढेर आएसँगै बजारमा भाइमसलाको मूल्य महँगिँदा उपभोक्तालाई भने चाडपर्वको किनमेलमा थप आर्थिक भार परेको छ ।
