तराई–मधेसको मौलिक संस्कृति, परम्परा र धार्मिक आस्थासँग जोडिएको पर्व हो गोधन कुटाई अर्थात् गोवर्धन पूजा ।
विशेषगरी मधेश प्रदेशका ग्रामीण तथा सहरी क्षेत्रमा यो पर्व परम्परागत विधिअनुसार मनाउने गरिन्छ ।
यस दिन घरपरिवारका सदस्य तथा स्थानीय महिलाहरूले गोबरबाट विभिन्न आकृति र प्रतीक बनाएर धार्मिक विधिअनुसार पूजा गर्ने परम्परा छ ।
पूजापछि गोधन कुटाई गर्ने चलन रहेको छ। यस पर्वलाई गाईवस्तु, कृषि तथा ग्रामीण जीवनसँग जोडिएको सांस्कृतिक परम्पराका रूपमा पनि लिइन्छ ।
धार्मिक मान्यताअनुसार गोवर्धन पर्वतको पूजा भगवान् श्रीकृष्णसँग जोडिएको छ । भगवान् श्रीकृष्णले गोवर्धन पर्वत उठाएर गोकुलवासीलाई वर्षा र विपत्तिबाट संरक्षण गरेको प्रसङ्गसँग यस पर्वको सम्बन्ध रहेको धार्मिक विश्वास छ।
गोधन कुटाई सम्पन्न भएसँगै अब तराई–मधेसमा छठ पर्वको तयारीले गति लिनेछ ।
छठ पूजाका लागि आवश्यक माटो ल्याउने, घरआँगन लिपपोत गर्ने, नयाँ चुल्हो बनाउने तथा पूजाका सामग्री जुटाउने काम सुरु हुनेछ ।
छठ पर्वमा शुद्धता र पवित्रतालाई विशेष महत्त्व दिइने भएकाले व्रतालु परिवारले पूजाको तयारीमा विशेष ध्यान दिने गर्छन् ।
केही दिनपछि अस्ताउँदो र उदाउँदो सूर्यलाई अर्घ्य दिएर मनाइने छठ पर्वले तराई–मधेसको धार्मिक, सांस्कृतिक र सामाजिक एकतालाई थप बलियो बनाउनेछ ।
