मधेश प्रदेशका विभिन्न जिल्लामा यौनजन्य हिंसाका घटना बढ्दै गएको भन्दै त्यसको रोकथाम तथा न्यूनीकरणका लागि वीरगंजमा तीनदिने सचेतनामूलक अभियान सुरु गरिएको छ ।
अपराध अनुसन्धान विभागको ७१औँ स्थापना दिवसको अवसर पारेर मधेशमा बढ्दो यौनजन्य हिंसाविरुद्ध जनचेतना फैलाउने उद्देश्यले अभियान सञ्चालन गरिएको हो ।
वीरगंजको घण्टाघरबाट पर्साका प्रमुख जिल्ला अधिकारी भोला प्रसाद दाहालले अभियानको उद्घाटन गर्दै औपचारिक सुरुवात गरेका हुन् ।
उद्घाटन कार्यक्रममा नेपाल प्रहरी प्रदेश कार्यालय वीरगञ्जका प्रमुख प्रहरी वरिष्ठ उपरीक्षक (एसएसपी) कृष्णबहादुर पल्ली मगरले यौनजन्य हिंसामुक्त समाज निर्माणका लागि प्रहरीले अभियान सञ्चालन गरेको बताए ।
उनका अनुसार पछिल्लो समय मधेश प्रदेशका विभिन्न जिल्लामा यौनजन्य हिंसाका घटना देखिएकाले त्यसलाई न्यूनीकरण गर्न प्रहरी प्रधान कार्यालयको परिपत्रअनुसार तीनदिने अभियान सुरु गरिएको हो ।
यस्ता अपराध नियन्त्रणका लागि प्रहरीको प्रयास मात्रै पर्याप्त नहुने भन्दै उनले समाजका सबै वर्ग, नागरिक समाज, संघसंस्था तथा सरोकारवाला निकायको सहकार्य आवश्यक रहेको बताए । सबैको हातेमालोबाट मात्रै यौनजन्य हिंसाका घटनामा कमी ल्याउन सकिने उनको भनाइ छ ।
जिल्ला प्रहरी कार्यालय पर्साले आयोजना गरेको कार्यक्रममा पर्साका प्रहरी प्रमुख पवन भट्टराई, सशस्त्र प्रहरी प्रमुख मोहन क्षेत्री, नागरिक समाजका अगुवा, विभिन्न संघसंस्थाका प्रतिनिधि तथा विद्यार्थीहरूको सहभागिता रहेको थियो ।
अभियानको उद्घाटनपछि घण्टाघरबाट सचेतनामूलक र्याली निकालिएको थियो। नगरका विभिन्न भागको परिक्रमा गरेको र्याली पुनः घण्टाघरमै पुगेर समापन भएको थियो ।
तीनदिने अभियानमार्फत यौनजन्य हिंसाविरुद्ध जनचेतना अभिवृद्धि गर्ने, अपराध रोकथाममा नागरिकको भूमिका बढाउने तथा हिंसामुक्त समाज निर्माणका लागि सामूहिक पहल गर्ने लक्ष्य राखिएको छ ।