काठमाडौँ । लुम्बिनी लायन्स नेपाल प्रिमियर लिग (एनपीएल) को फाइनलमा प्रवेश गरेको छ । मंगलबार कीर्तिपुरस्थित त्रिवि क्रिकेट मैदानमा भएको पहिलो क्वालिफायरमा सुदूरपश्चिम रोयल्सलाई ६ विकेटले पराजित गर्दै लुम्बिनीले फाइनलमा स्थान पक्का गरेको हो ।
सुदूरपश्चिमले दिएको १०६ रनको लक्ष्य लुम्बिनीले १६.४ ओभरमा ४ विकेट गुमाएर पूरा गर्यो । लुम्बिनीको जितमा नटआउट रहेका निरोशन डिकवेलाले सर्वाधिक ५९ रन बनाए। उनले ३७ बलमा उक्त रन बनाएका हुन्। त्यस्तै, रोहित पौडेलले २१ र दिलीप नाथले अविजित १० रनको योगदान दिए ।
यसअघि टस जितेर पहिले ब्याटिङ गरेको सुदूरपश्चिम रोयल्सले निर्धारित २० ओभरमा ८ विकेट गुमाउँदै १०५ रन बनाएको थियो । सुदूरपश्चिमका कप्तान दीपेन्द्रसिंह ऐरीले सर्वाधिक ५२ रन बनाए भने इशान पाण्डेले २७ रन जोडे।
लुम्बिनीका रुबेन ट्रम्पलम्यान र शेर मल्लले समान २ विकेट लिए। त्यस्तै, अभिषेक गौतम र किशोर महतोले समान १ विकेट हात पारे ।
अघिल्लो संस्करणको विजेतासमेत रहेको लुम्बिनीले पहिलो क्वालिफायर जितेसँगै लगातार दोस्रो पटक उपाधि जित्ने लक्ष्यलाई थप बलियो बनाएको छ ।