बचतकर्ताको रकम हिनामिना गरी फरार रहेका धरानस्थित बराह बचत तथा ऋण सहकारी संस्थाका अध्यक्ष शिवकुमार लामिछाने (विश्वकर्मा) पक्राउ परेका छन् ।
केन्द्रीय अनुसन्धान ब्युरो (सीआईबी) को टोलीले लामिछानेलाई पक्राउ गरेको हो । उनलाई पक्राउ गरिएको सुनसरीका प्रहरी प्रमुख प्रहरी उपरीक्षक (एसपी) पुष्पराज मल्लले पुष्टि गरेका छन् ।
यसअघि गृहमन्त्री सुधन गुरुङले समेत सामाजिक सञ्जालमार्फत बराह सहकारीका मुख्य योजनाकार पक्राउ परेको जानकारी दिँदै पूर्वका बचतकर्ताले न्याय पाएको बताएका थिए ।
गुरुङले एक वर्षअघि धरानमा ‘सेभ घोपा’ अभियान सञ्चालन गर्ने क्रममा बीपी कोइराला स्वास्थ्य विज्ञान प्रतिष्ठानको बेथितिविरुद्ध आवाज उठाउँदा पूर्वका बचतकर्ताले भोगिरहेको पीडाबारे आफू जानकार भएको उल्लेख गरेका छन् ।
अभियन्ताका रूपमा रहँदा तथा जेनजी आन्दोलनपछिका प्रयासमा तत्काल केही गर्न नसके पनि गृहमन्त्रीको जिम्मेवारी सम्हालेकै दिनदेखि पीडितलाई न्याय दिलाउन खोजी तीव्र पारिएको उनको भनाइ छ ।
गृहमन्त्री गुरुङले ५ अर्ब ८८ करोड रुपैयाँभन्दा बढी बिगो हिनामिनाका मुख्य योजनाकारलाई कानुनी कठघरामा उभ्याउन सफल भएको उल्लेख गर्दै बाँकी दोषीको खोजी तथा कारबाही प्रक्रिया पनि तीव्र बनाइने बताएका छन् ।
बराह बचत तथा ऋण सहकारी संस्थाका सञ्चालकहरूले धरानसहित देशभरका ४ हजार ७७२ जनाभन्दा बढी बचतकर्ताको १० अर्ब ७३ करोड रुपैयाँभन्दा बढी रकम हिनामिना गरेको आरोप छ । बचतकर्ताको रकम फिर्ता गर्न नसकेपछि संस्थाका अध्यक्ष लामिछाने फरार रहेका थिए ।
सहकारीका अध्यक्षसहित सञ्चालकहरू फरार भएपछि बचतकर्ताले रकम फिर्ताको माग गर्दै प्रहरीमा उजुरी दिएका थिए । उजुरीका आधारमा जिल्ला प्रहरी कार्यालय सुनसरीले सहकारीको रकम हिनामिना तथा अपचलनसम्बन्धी घटनाको अनुसन्धान अघि बढाएको थियो ।
प्रहरी निरीक्षक दिनेश अधिकारीको नेतृत्वमा गरिएको अनुसन्धानपछि तयार पारिएको प्रतिवेदनमा कुल १० अर्ब ७३ करोड ४३ लाख ४७ हजार ९१३ रुपैयाँ हिनामिना तथा अपचलन गरी ठगी भएको निष्कर्ष निकालिएको छ ।
प्रहरीको अभियोगपत्रअनुसार बचतकर्ताको रकममध्ये सबैभन्दा बढी हिनामिना गरेको आरोप शिवकुमार लामिछानेमाथि छ । उनले मात्रै २ अर्ब ७१ करोड ३१ लाख ६० हजार २४ रुपैयाँ हिनामिना गरेको अभियोगपत्रमा उल्लेख छ ।
यस प्रकरणमा सहकारीका मुख्य सञ्चालक मानबहादुर विश्वकर्मा, गंगा कालिकोटेलगायतका व्यक्ति भने अझै फरार रहेको जनाइएको छ ।
लामिछानेको पक्राउसँगै लामो समयदेखि बचत फिर्ताको पर्खाइमा रहेका बराह सहकारीका पीडितले न्याय पाउने र हिनामिनामा संलग्न अन्य व्यक्तिमाथि पनि अनुसन्धान अघि बढ्ने अपेक्षा गरिएको छ ।