राष्ट्रिय खेलकुद परिषद् (राखेप) ले अखिल नेपाल फुटबल संघ (एन्फा) माथि लगाएको निलम्बन तथा प्रशासनिक र आर्थिक प्रतिबन्ध फुकुवा गरेको छ ।
राखेपको कार्यकारी समितिले बिहीबार निर्णय गर्दै एन्फामाथि यसअघि लगाइएका सबै प्रकारका निलम्बन तथा प्रतिबन्ध हटाउने निर्णय गरेको हो ।
राखेपका सदस्यसचिव रामचरित्र मेहताले पत्रमार्फत एन्फालाई निर्णयबारे जानकारी गराएका छन् । पत्रमा एन्फाले सन् २०२६ अप्रिल ५ मा पठाएको अनुरोध तथा यसअघि राखेपले जारी गरेका विभिन्न पत्रहरूलाई आधार मानेर प्रतिबन्ध फुकुवा गर्ने निर्णय गरिएको उल्लेख छ ।
राखेपले राष्ट्रिय खेलकुद विकास ऐन, २०७७ को दफा २९ को उपदफा (३) बमोजिम एन्फामाथिको निलम्बन तथा प्रशासनिक र आर्थिक प्रतिबन्ध फुकुवा गरेको जनाएको छ ।
यस निर्णयको जानकारी प्रधानमन्त्री तथा मन्त्रिपरिषद्को कार्यालय, शिक्षा तथा खेलकुद मन्त्रालय, अन्तर्राष्ट्रिय फुटबल महासंघ (फिफा) र एसियाली फुटबल महासंघ (एएफसी) लाई समेत गराइएको राखेपले जनाएको छ ।
एन्फामाथिको प्रतिबन्ध फुकुवाको निर्णय सार्वजनिक हुनुअघि नै शिक्षा तथा खेलकुदमन्त्री समित पोखरेलले एएफसीको बैठकका क्रममा थाइल्यान्डमा फिफा र एएफसीका प्रतिनिधिसँग भेट गर्ने कार्यक्रम रहेको थियो ।
एन्फाका प्रवक्ता सुरेश शाहले राखेपबाट निलम्बन फुकुवासम्बन्धी पत्र प्राप्त भएको पुष्टि गरेका छन् ।
यसअघि राखेपले गत माघमा एन्फामाथि प्रतिबन्ध लगाएपछि विश्व फुटबलको सर्वोच्च निकाय फिफाले पनि ‘तेस्रो पक्षको हस्तक्षेप’ (थर्ड पार्टी इन्टरफरेन्स) भएको भन्दै एन्फालाई प्रतिबन्ध लगाएको थियो ।
राखेपको पछिल्लो निर्णयसँगै एन्फामाथि लगाइएको आन्तरिक निलम्बन तथा प्रशासनिक र आर्थिक प्रतिबन्ध हटेको छ ।