गृहमन्त्री सुधन गुरुङकी आमाको भिडियो सामाजिक सञ्जालमा सार्वजनिक गरेको आरोपमा एक युट्युबरलाई प्रहरीले पक्राउ गरेको छ ।
पक्राउ पर्नेमा कालीकोट घर भई भक्तपुरमा बस्दै आएका छत्र बोगटी (सर्विन) रहेका छन् । उनलाई भक्तपुरबाट पक्राउ गरिएको जिल्ला प्रहरी परिसर काठमाडौंका प्रवक्ता प्रहरी उपरीक्षक (एसपी) दानबहादुर थापाले जानकारी दिएका छन् ।
बोगटीविरुद्ध वैयक्तिक गोपनीयताको हक हनन गरेको कसुरमा अनुसन्धान अघि बढाइएको छ । काठमाडौं जिल्ला अदालतबाट पाँच दिनको म्याद थप गरी उनीमाथि अनुसन्धान भइरहेको प्रहरीले जनाएको छ ।
गृहमन्त्री गुरुङकी ४९ वर्षीया आमा ज्ञानु लामा (ज्वालादेवी चण्डिमाता) ले आफ्नो अनुमतिबिना भिडियो खिचेर सामाजिक सञ्जालमा सार्वजनिक गरिएको भन्दै जिल्ला प्रहरी परिसर काठमाडौंमा उजुरी दिएकी थिइन् । सोही उजुरीका आधारमा बोगटीलाई पक्राउ गरिएको प्रहरी स्रोतले जनाएको छ ।
लामो समयदेखि घरपरिवार त्यागेर धार्मिक जीवन बिताउँदै आएकी लामाको भिडियो केही दिनयता सामाजिक सञ्जालमा भाइरल भएको थियो । उक्त भिडियोमा उनले छोरा सुधनसँगको सम्बन्ध, पारिवारिक अवस्था र आफ्नो जीवनशैलीबारे कुराकानी गरेकी छन् ।
भिडियोमा लामाले आफूका दुई छोरी र एक छोरा रहेको बताउँदै छोरा गृहमन्त्री भएपछि भेट नभएको र कहिलेकाहीँ काम पर्दा फोनमा कुराकानी हुने गरेको उल्लेख गरेकी छन् ।
छोराछोरीले आर्थिक सहयोग गर्ने गरेको प्रश्नमा उनले आफू शारीरिक रूपमा सक्षम रहेकाले अहिले उनीहरूको सहयोग आवश्यक नरहेको बताएकी छन् । आपत्कालीन अवस्था आएमा मात्रै छोराछोरीको सहयोग लिने उनको भनाइ छ ।
विभिन्न आश्रममा बस्दै आएको बताएकी लामाले आफू सडकमा मागेर खानुपर्ने अवस्थामा नरहेको पनि स्पष्ट पारेकी छन् । छोरालाई भेट्न जाने विषयमा उनले आफ्नो बसोबासको व्यवस्था मिलिसकेपछि भेट्न बोलाउने बताएकी छन् ।
आफ्नो भिडियो सामाजिक सञ्जालमा भाइरल भएपछि लामा आक्रोशित बनेकी थिइन् । उनले छुट्टै भिडियो सार्वजनिक गर्दै आफूले अन्तर्वार्ता दिन अनुमति नदिएको र सामान्य कुराकानीका क्रममा लुकेर भिडियो खिचिएको आरोप लगाएकी थिइन् ।
उनले आफ्नो अनुमतिबिना व्यक्तिगत कुराकानी र भिडियो सार्वजनिक गरेर दुःख दिने व्यक्तिमाथि कारबाही गर्न माग गरेकी छन् । साथै, व्यक्तिगत जीवनसँग जोडिएका विषयलाई मनोरञ्जन वा पैसा कमाउने माध्यम नबनाउन सामाजिक सञ्जाल प्रयोगकर्तालाई आग्रह गरेकी छन् ।
यसैबीच, पक्राउ परेका बोगटी कलाकारसमेत हुन् । उनी नेपाली लोक तथा देउडा गायक, संगीतकार तथा डिजिटल सामग्री निर्माता (डिजिटल क्रिएटर) का रूपमा परिचित छन् । उनले गायिका अञ्जु पन्तलगायतका कलाकारसँग सहकार्य गरी गीतसमेत सार्वजनिक गरेका छन् । आफ्नै युट्युब च्यानलमार्फत पनि विभिन्न सिर्जना सार्वजनिक गर्दै आएका छन् ।
गृहमन्त्री निकट स्रोतका अनुसार सुधन गुरुङ सानै हुँदा उनकी आमाले घर छाडेकी थिइन् । त्यसपछि उनलाई मावली परिवारले हुर्काएको बताइएको छ ।