मधेस प्रदेशमा नयाँ सरकार गठनका लागि प्रदेश प्रमुखले दिएको समयसीमा सकिन एक दिन मात्र बाँकी रहँदासमेत राजनीतिक दलहरूबीच सत्ता नेतृत्व र सरकार गठनको स्वरूपबारे सहमति जुट्न सकेको छैन ।
दलहरूबीच निरन्तर छलफल भइरहे पनि कुन दलको नेतृत्वमा नयाँ सरकार गठन गर्ने भन्ने विषय टुंगिन नसक्दा राजनीतिक अन्योल बढेको छ ।
कुनै पनि दलसँग एकल सरकार गठनका लागि आवश्यक बहुमत नरहेकाले तीनदेखि चार दलबीचको सहकार्यबाट मात्रै नयाँ सरकार गठन हुने अवस्था छ । तर, गठबन्धन निर्माण र मुख्यमन्त्रीको नेतृत्वबारे दलहरूबीच ठोस समझदारी बन्न सकेको छैन ।
नेपाल कम्युनिष्ट पार्टी (एमाले) र नेपाली कम्युनिष्ट पार्टी (नेकपा) ले नेपाली कांग्रेस नेतृत्वको सरकारलाई दिएको समर्थन फिर्ता लिएपछि मुख्यमन्त्री कृष्णप्रसाद यादवले पदबाट राजीनामा दिएका थिए ।
मुख्यमन्त्री यादवको राजीनामा स्वीकृत गर्दै प्रदेश प्रमुख सुरेन्द्रलाभ कर्णले संविधानको धारा १६८ को उपधारा (२) बमोजिम प्रदेशसभामा प्रतिनिधित्व गर्ने दुई वा दुईभन्दा बढी दलको समर्थनमा बहुमत प्राप्त गर्न सक्ने प्रदेशसभा सदस्यलाई मुख्यमन्त्री नियुक्तिका लागि दाबी पेस गर्न शुक्रबारसम्मको समयसीमा दिएका छन् ।
समयसीमा नजिकिँदै जाँदा पनि सरकार गठनको विषयमा सहमति जुट्न नसकेको नेकपा संसदीय दलका नेता युवराज भट्टराईले बताएका छन् ।
उनका अनुसार विभिन्न दलबीच छलफल जारी रहे पनि कुन दलको नेतृत्वमा सरकार गठन गर्ने भन्ने विषयमा निर्णय भइसकेको छैन । उनले नयाँ सरकार गठनका लागि आफ्नो पार्टी सहयोगी भूमिका निर्वाह गर्न तयार रहेको पनि बताए ।
यता, मधेस प्रदेशसभाको सबैभन्दा ठूलो दल जनता समाजवादी पार्टी (जसपा) नेपालले सरकार गठनबारे ठोस निर्णय लिन नसक्दा पनि राजनीतिक समीकरणले पूर्णता पाउन सकेको छैन । एमाले र नेकपाले जसपा नेपालको नेतृत्वमा नयाँ सरकार गठन गर्न चाहेको भए पनि जसपाले नेतृत्व लिने वा नलिने भन्ने विषयमा निर्णय गरिसकेको छैन ।
यसअघि पटकपटक सरकार परिवर्तन भएको र आगामी निर्वाचनसमेत नजिकिएकाले जसपा नेपालका नेताहरूले पुनः सरकारको नेतृत्व लिन अनिच्छा देखाएको बताइएको छ ।
जसपा नेपाल मधेस प्रदेश संसदीय दलका नेता सरोजकुमार यादवले सरकार गठनबारे निर्णय गर्ने जिम्मेवारी पार्टी अध्यक्ष उपेन्द्र यादवलाई दिइएको जानकारी दिएका छन् ।
यसैबीच, जनमत पार्टीका अध्यक्ष डा. सिके राउतले केही दिनअघि आफ्नो पार्टी मधेस प्रदेश सरकारमा सहभागी नहुने स्पष्ट पारेका थिए । जनमत पार्टी सरकारमा सहभागी नहुने अडानमा रहेपछि सरकार गठनका लागि अन्य दलबीचको सहकार्य थप महत्त्वपूर्ण बनेको छ ।
१०७ सदस्यीय मधेस प्रदेशसभामा दलगत अवस्था यस्तो छ :
|
राजनीतिक दल
|
प्रदेशसभा सदस्य
|
|
जसपा नेपाल
|
२८
|
|
नेकपा (एमाले)
|
२४
|
|
नेपाली कांग्रेस
|
२२
|
|
नेपाली कम्युनिष्ट पार्टी (नेकपा)
|
१५
|
|
जनमत पार्टी
|
१२
|
|
नेपाल संघीय समाजवादी पार्टी
|
१
|
|
राष्ट्रिय प्रजातन्त्र पार्टी
|
१
|
|
जम्मा
|
१०३ ?
|
प्रदेशसभामा कुनै पनि दलको स्पष्ट बहुमत नरहेकाले नयाँ सरकार गठनका लागि बहुदलीय सहकार्य अनिवार्य देखिएको छ । तर, सरकारको नेतृत्व कसले गर्ने र कुन–कुन दलबीच गठबन्धन बन्ने भन्ने विषय अझै टुंगिएको छैन ।
प्रदेश प्रमुखले दिएको समयसीमा सकिन लाग्दासमेत दलहरूबीच सहमति नजुटेमा मधेस प्रदेशको आगामी सत्ता समीकरण थप पेचिलो बन्ने देखिएको छ ।