काठमाडौं | सरकारले राजावादीको अराजक प्रदर्शनमा सहभागी नहुन अपिल गरेको छ । सोमबार बसेको मन्त्रिपरिषद् बैठकको निर्णय सार्वजनिक गर्न मङ्गलवार आयोजित पत्रकार सम्मेलनमा सरकारका प्रवक्ता तथा सूचना र प्रविधिमन्त्री पृथ्वीसुब्बा गुरुङले राजावादीको हिंसात्मक प्रदर्शनमा सहभागी नहुन आम सर्वसाधारणलाई आग्रह गरे ।
गुरुङका अनुसार, सोमबारको मन्त्रिपरिषद् बैठकले शुक्रबार तीनकुनेमा राजावादीले गरेको हिंसात्मक प्रदर्शनको कडा निन्दा गरेको छ । साथै, यस घटनामा घाइते भएका व्यक्तिहरूको उपचारको व्यवस्था मिलाउन स्वास्थ्य तथा जनसङ्ख्या मन्त्रालयलाई जिम्मेवारी दिने निर्णय पनि गरिएको जानकारी दिए ।
बैठकले घटनाको सत्य तथ्य छानबिन गर्न र दोषीमाथि कारबाही गर्न गृह मन्त्रालयलाई निर्देशन दिने निर्णय पनि गरेको छ। सरकारको यो निर्णयपछि सुरक्षा स्थिति सुधार गर्न र आगामी दिनमा यस्ता घटनाको पुनरावृत्ति नगर्नको लागि कडा कदम चालिने छ ।
