नेपाल प्रिमियर लिग (एनपिएल) को तेस्रो संस्करणअन्तर्गत मंगलबार भइरहेको १२औँ खेलमा जनकपुर बोल्ट्सले विराटनगर किंग्सविरुद्ध टस जितेर पहिले बलिङ गर्ने निर्णय गरेको छ ।
कीर्तिपुरस्थित त्रिभुवन विश्वविद्यालय क्रिकेट मैदानमा जारी खेलमा जनकपुरका कप्तान हर्मित सिंहले टस जितेर विराटनगरलाई पहिले ब्याटिङको निम्तो दिएका हुन् ।
जनकपुर र विराटनगर दुवै टोलीका लागि प्रतियोगिताको यो चौथो खेल हो ।
जनकपुर बोल्ट्सले प्रतियोगिताको पहिलो खेलमा कर्णाली याक्ससँग १९ रनको हार बेहोरेको थियो । दोस्रो खेलमा काठमाडौं गोर्खाजलाई ८ विकेटले पराजित गरेको जनकपुरले तेस्रो खेलमा पोखरा एभेन्जर्सलाई ९ रनले हराएको थियो ।
यता विराटनगर किंग्सले पहिलो खेलमा चितवन राइनोजसँग ८ रनको हार बेहोरेको थियो। दोस्रो खेलमा कर्णाली याक्ससँग ४ विकेटले पराजित भएको विराटनगरले तेस्रो खेलमा भने सुदूरपश्चिम रोयल्सलाई ३५ रनले हराउँदै जितको लयमा फर्किएको थियो ।
दुवै टोली आजको खेल जित्दै प्रतियोगितामा आफ्नो स्थिति बलियो बनाउने लक्ष्यका साथ मैदानमा उत्रिएका छन् ।
