मुम्बई इन्डियन्सका प्रमुख बलर जसप्रीत बुमराह ढाडको चोटपछि पुनः टिममा फर्किएका छन् । आगामी अप्रिल ७ मा मुम्बईको वानखेडे स्टेडियममा हुने रोयल च्यालेन्जर्स बैंगलोर (आरसीबी) सँगको खेलअघि बुमराह टोलीसँग पुनः आबद्ध भएका हुन् ।
तर, बुमराहलाई आरसीबीविरुद्धको खेलमा प्लेइङ इलेभनमा स्थान मिल्छ कि मिल्दैन भन्ने कुरा अझै अन्योल छ । बुमराहले भारतीय क्रिकेट कन्ट्रोल बोर्ड (BCCI) अन्तर्गतको एक्सिलेन्स सेन्टरमा लामो समय बिताएका थिए, जसका बाद उनले मुम्बई इन्डियन्ससँग प्रशिक्षण सुरु गरिसकेका छन् ।
उनको फिटनेसको बारेमा अन्तिम निर्णय आउन बाँकी छ। बुमराहको आईपीएलमा पूर्णपारूपमा पुनरागमन १३ अप्रिलमा दिल्ली क्यापिटल्सविरुद्धको खेलमा हुने अपेक्षा गरिएको छ । सन् २०१३ देखि मुम्बई इन्डियन्सको बलिङ आक्रमणको मेरुदण्ड मानिने बुमराहले फ्रेन्चाइजका लागि १३३ खेलमा १६५ विकेट लिएका छन्। उनले गत वर्षको आईपीएल चोटका कारण गुमाएका थिए ।
बुमराहको पछिल्लो चोट सन् २०२५ को जनवरी ४ मा सिड्नीमा भएको बोर्डर-गावस्कर ट्रफीको टेस्ट खेलमा लागेको थियो, जसका कारण उनी च्याम्पियन्स ट्रफी र आईपीएलको सुरुआतका खेलहरू मिस गर्न बाध्य भए ।
मुम्बई इन्डियन्सले बुमराहलाई यस सिजनका लागि १८ करोड रुपैयाँमा रिटेन गरेको छ। मुम्बई इन्डियन्सले हालसम्म ४ खेल खेलेको छ र केवल एक खेलमा मात्र विजय प्राप्त गरेको छ। उनीहरूले हाल अङ्क तालिकामा सातौँ स्थानमा छन् ।
