भारतको ओडिशा राज्यको भुवनेश्वरस्थित कलिंगा इन्स्टिच्युट अफ इन्डस्ट्रियल टेक्नोलोजी (केआईआईटी) विश्वविद्यालयमा अध्ययनरत नेपाली विद्यार्थी प्रिसा साह आफ्नै होस्टेल कोठामा झुण्डिएको अवस्थामा मृत फेला परेकी छन् ।
वीरगंजकी १९ वर्षीया साह स्नातक तहको पहिलो वर्षमा अध्ययनरत थिइन् । बिहीबार साँझ उनका साथीहरूले होस्टेलको चौथो तलामा रहेको कोठामा उनको शव फेला पारेका हुन् ।
घटनापछि विश्वविद्यालय प्रशासनले अन्य नेपाली विद्यार्थीहरूलाई होस्टेलबाट बाहिर निस्कन दिएको छैन् । घटनाको अनुसन्धान जारी रहेको बताइएको छ । यश घटनाले नेपाली विद्यार्थीहरूमा त्रास र असुरक्षाको भावना बढ्दै गएको छ ।
केआईआईटी विश्वविद्यालयमा केही महिना अघि मात्रै यस्तै घटना भएको थियो । बुटवलकी तेस्रो वर्षकी बीटेक विद्यार्थी प्रकृति लम्साल फेब्रुअरी १६ मा आफ्नै होस्टेल कोठामा मृत फेला परेकी थिइन् । अनुसन्धानमा भारतीय सहपाठी आद्विक श्रीवास्तवद्वारा निरन्तर गरिएको मानसिक यातनाका कारण उनले आत्महत्या गरेको निष्कर्ष निकालिएको थियो ।
विश्वविद्यालयले उक्त घटनापछि दुई सुरक्षाकर्मीलाई बर्खास्त गरेको र दुई होस्टेल अधिकारी तथा एक अन्तर्राष्ट्रिय सम्बन्ध कार्यालयका अधिकारीलाई निलम्बन गरेको थियो । साथै, नेपाली विद्यार्थीहरूको सुरक्षाका लागि २४/७ कन्ट्रोल रूम स्थापना गरिएको थियो ।
लम्सालको मृत्युपछि नेपाली दूतावासले घटनाको निष्पक्ष अनुसन्धानको माग गर्दै भारतीय सरकारसँग समन्वय गरेको थियो । विश्वविद्यालयले लम्सालको सम्झनामा नेपाली विद्यार्थीहरूका लागि विशेष छात्रवृत्ति घोषणा गरेको थियो ।
प्रिसा साहको मृत्युले केआईआईटी विश्वविद्यालयमा नेपाली विद्यार्थीहरूको सुरक्षाप्रति पुनः गम्भीर प्रश्न उठाएको छ ।
1-1745576478.jpg)
