बाराको जनता समाजवादी पार्टी (जसपा) नेपालको जिल्ला कार्यसमितिको नेतृत्वका लागि सम्पन्न निर्वाचनमा रमेशकुमार यादव अध्यक्षमा निर्वाचित भएका छन् ।
आइतबार सम्पन्न निर्वाचनमा यादव नेतृत्वको प्यानलले बहुमत प्राप्त गर्दै अधिकांश पदमा जित हासिल गरेको हो । पचरौता नगरपालिकाका पूर्व नगरप्रमुख समेत रहेका यादवले २६९ मत प्राप्त गर्दै आफ्ना प्रतिस्पर्धी धर्मबीरप्रसाद यादवलाई ९४ मतको फराकिलो अन्तरले पराजित गरे। धर्मबीरप्रसाद यादवले १७५ मत प्राप्त गरेका थिए ।
यादव प्यानलकै शिवेन्द्र प्रताप सिंह र पुनम कुशवाहा उपाध्यक्ष पदमा निर्वाचित भए । सिंहले २५३ र कुशवाहाले २४६ मत प्राप्त गरे । उनीहरूका प्रतिस्पर्धी म. मुरतुजा अन्सारीले १९९ र सुरेन्द्रप्रसाद साहले १८९ मत पाए ।
सचिव पदमा शम्भुकुमार गुप्ता २६१ मतसहित निर्वाचित भए भने मुकेशकुमार पाण्डे १९२ मतसहित पराजित भए । सहसचिवमा सिकेन्द्र दासले २७२ र नन्दन गुप्ताले २४७ मत प्राप्त गरी विजयी भए । उनीहरूका प्रतिस्पर्धी धनसुनर यादव र सुनैनाकुमारी चौधरीले क्रमशः १४६ र १३५ मत प्राप्त गरे ।
कोषाध्यक्ष पदमा विनोदप्रसाद यादव २६८ मतसहित विजयी भए भने शारदा यादवले १६० मत पाए ।
निर्वाचनमा जम्मा ४७२ मत खसेको निर्वाचन समितिले जनाएको छ । उम्मेदवार चयन, प्रचारप्रसार र मतदान प्रक्रियामा समावेशी सहभागिता देखिएको यो निर्वाचन बारामा सक्रिय जसपाका कार्यकर्ताहरूको व्यापक उपस्थितिका कारण निकै रोचक र प्रतिस्पर्धात्मक बनेको थियो ।
