मुलुककै प्रमुख भन्सार नाका वीरगंज भन्सार कार्यालयले करिब चार वर्षपछि राजस्व सङ्कलनको मासिक लक्ष्य पूरा गरेको छ । चालु आर्थिक वर्ष २०८३/८४ को भदौ र असोज महिनामा लगातार लक्ष्यभन्दा बढी राजस्व सङ्कलन गर्दै कार्यालयले लामो समयदेखिको लक्ष्य हासिल गर्न नसक्ने अवस्था तोडेको हो ।
वीरगंज भन्सार कार्यालयका सूचना अधिकारी पूर्णप्रसाद लम्सालका अनुसार भन्सार विभागले निर्धारण गरेको मासिक राजस्व सङ्कलन लक्ष्य विगत ५० महिनादेखि पूरा हुन सकेको थिएन । तर, चालु आर्थिक वर्षको पछिल्लो दुई महिनामा भने कार्यालयले लगातार लक्ष्य हासिल गरेको छ ।
कोभिड–१९ महामारी, अन्तर्राष्ट्रिय आर्थिक सङ्कट तथा विभिन्न आर्थिक उतारचढावका कारण आयात–निर्यातमा कमी आउँदा पछिल्ला चार वर्षदेखि भन्सार कार्यालयले लक्ष्यअनुसार राजस्व सङ्कलन गर्न सकेको थिएन ।
कार्यालयका अनुसार चालु आर्थिक वर्षको साउन महिनामा भन्सार विभागले २० अर्ब ५८ करोड रुपैयाँ राजस्व सङ्कलनको लक्ष्य दिएको थियो । तर, उक्त महिनामा लक्ष्यको ९१.२४ प्रतिशत अर्थात् १८ अर्ब ७७ करोड रुपैयाँ मात्रै राजस्व सङ्कलन भएको थियो ।
त्यस्तै, भदौ महिनामा २३ अर्ब ५२ करोड रुपैयाँ राजस्व सङ्कलन गर्ने लक्ष्य दिइएकोमा कार्यालयले लक्ष्यभन्दा बढी २३ अर्ब ६१ करोड ९७ लाख रुपैयाँ सङ्कलन गरेको थियो । यो निर्धारित लक्ष्यको १००.४२ प्रतिशत हो ।
असोज महिनामा पनि वीरगंज भन्सार कार्यालयले राजस्व सङ्कलनमा सुधारलाई निरन्तरता दिएको छ । उक्त महिनाका लागि २६ अर्ब ४६ करोड रुपैयाँ लक्ष्य निर्धारण गरिएकोमा २६ अर्ब ५१ करोड ५९ लाख रुपैयाँ सङ्कलन भएको कार्यालयले जनाएको छ । यो लक्ष्यको १००.२१ प्रतिशत हो ।
आर्थिक वर्ष २०७८/७९ को जेठ महिनायता वीरगंज भन्सार कार्यालयले कुनै पनि महिनामा भन्सार विभागले निर्धारण गरेको राजस्व सङ्कलनको लक्ष्य पूरा गर्न सकेको थिएन ।
करिब चार वर्षसम्म लगातार लक्ष्य पूरा गर्न नसकेको भन्सार कार्यालयले चालु आर्थिक वर्षको सुरुवाती महिनादेखि नै राजस्व सङ्कलनमा सुधार देखाउँदै पछिल्ला दुई महिनामा लक्ष्य हासिल गर्नुले भन्सार राजस्वमा सकारात्मक संकेत देखिएको छ ।
