करिब १ अर्ब २६ करोड रुपैयाँ अपचलन प्रकरणका मुख्य अभियुक्त कर्णाली विकास बैंकका तत्कालीन अध्यक्ष राजेन्द्रवीर राय पक्राउ परेका छन् ।
नेपाल प्रहरीको केन्द्रीय अनुसन्धान ब्युरो (सीआईबी) ले फरार रहेका रायलाई पक्राउ गरेको हो। सीआईबी प्रमुख एआइजी चन्द्रकुवेर खापुङले नेपाल प्रेससँग कुरा गर्दै राय पक्राउ परेको पुष्टि गरेका छन् ।
सीआईबीका अनुसार उनलाई काठमाडौंमा पक्राउ गरिएको भनिए पनि एक स्रोतका अनुसार भारतबाट पक्राउ गरेर नेपाल ल्याइएको हो ।
कर्णाली विकास बैंकको केन्द्रीय कार्यालय नेपालगञ्जमा रहेको छ। सो बैंकमा पूर्वकार्यकारी अध्यक्ष, पूर्व र वर्तमान प्रमुख कार्यकारी अधिकृत (सीईओ) तथा वित्त विभाग प्रमुखको मिलेमतोमा करिब १ अर्ब २६ करोड रुपैयाँको अपचलन भएको पाइएको थियो ।
बैंक सञ्चालक समिति अध्यक्ष डा. ओमप्रकाश मिश्रको संयोजकत्वमा गठित विशेष छानबिन समितिको प्रतिवेदन अनुसार, बैंकको अन्य बैंकहरूमा रहेका खातामा रहेको रकम र बैंकको कोर बैंकिङ प्रणाली (CBS) मा देखिएको रकमबीच तुलना गर्दा ठूलो अन्तर देखिएको थियो ।
बैंकको आन्तरिक छानबिन अनुसार अपचलनमा रायसँगै पूर्व सीईओ दिनेशकुमार रावत, वित्त विभाग प्रमुख बेदप्रकाश ठकुरी र निरजविक्रम शाह संलग्न रहेको पाइएको छ ।
यसअघि कर्णाली विकास बैंकलाई नेपाल राष्ट्र बैंकले ‘समस्याग्रस्त बैंक’ घोषणा गर्दै यसको व्यवस्थापनमा सीधा हस्तक्षेप गरिसकेको छ ।
