जनकपुरधाम । धनुषाको जनकपुरधाम उपमहानगरपालिका–२० मा दशैंमेला हेरेर फर्किरहेका एक युवक र एक बालिकालाई धम्क्याएर रकम असुल गरेको तथा बाल यौन दुरुपयोग गरेको आरोपमा प्रहरीले चार जनालाई पक्राउ गरेको छ ।
जिल्ला प्रहरी कार्यालय धनुषाका अनुसार, गत कात्तिक ४ गते राति करिब ८ बजे बसैलातर्फ पैदल हिँडिरहेका युवक र बालिकालाई दुईवटा मोटरसाइकलमा आएका चार जनाको समूहले बाटो छेकेर नियन्त्रणमा लिएको थियो ।
प्रहरीका अनुसार, आरोपितहरूले युवक र बालिकाको भिडियो बनाएर सामाजिक सञ्जालमा अपलोड गरिदिने धम्की दिएका थिए। साथै, पीडितका अभिभावकलाई फोन गरी धम्क्याउँदै रकम मागेको र मोबाइल बैंकिङमार्फत ६ हजार रुपैयाँ ट्रान्सफर गर्न लगाएको प्रारम्भिक अनुसन्धानबाट खुलेको छ ।
त्यसैगरी, बालिकाको संवेदनशील अंगमा गलत मनसायले छोएको आरोपसमेत पक्राउ परेकाहरूमाथि लागेको प्रहरीले जनाएको छ ।
घटनामा संलग्न रहेको आरोपमा जनकपुरधाम उपमहानगरपालिका–२० निवासी २३ वर्षीय सुकन महतो, २६ वर्षीय सन्तोष कुमार दास, २२ वर्षीय पनेश कुमार महतो र ३० वर्षीय सुजित महतोलाई प्रहरीले कात्तिक ५ गते बिहान करिब ३ बजे दुईवटा मोटरसाइकलसहित नियन्त्रणमा लिएको हो ।
पक्राउ परेका चारै जनामाथि आपराधिक लाभ लिन नहुने तथा बाल यौन दुरुपयोगसम्बन्धी कसुरमा थप अनुसन्धान भइरहेको जिल्ला प्रहरी कार्यालय धनुषाका प्रवक्ता एवं प्रहरी नायब उपरीक्षक ओमप्रकाश खनालले जानकारी दिएका छन् ।
प्रहरीले घटनाबारे थप अनुसन्धान गरिरहेको जनाएको छ ।
