पर्सा, बारा र रौतहटका हजारौं किसान असार महिनामा पानीको अभावका कारण रोपाइँ गर्न नसकेर चिन्तित भएका छन् ।
भारतसँगको सन् १९५६ को गण्डक सिँचाइ तथा जलविद्युत् सम्झौताअनुसार नेपालले पाउने भनिएको ८५० क्यूसेक पानी अहिलेसम्म पूरा नहुँदा कृषकहरू मारमा परेका हुन् । नारायणी सिँचाइ कार्यालय पर्साका अनुसार, भारतले हाल दैनिक ५३५ क्यूसेक मात्र पानी पठाइरहेको छ । सम्झौताअनुसार गण्डक नहरमार्फत पर्सा, बारा र रौतहट जिल्लाको झन्डै ३७ हजार हेक्टर क्षेत्रफलमा सिँचाइ हुनुपर्ने हो, तर अहिलेसम्म २८ हजार हेक्टर क्षेत्रमा मात्र पानी पुगेको छ ।
कृषकहरूले रोपाइँका लागि बीउ तयार गरिसकेका छन्, तर खेतमा पानी नपुगेपछि समस्यामा परेका छन् । पर्साको केही ब्लकमा मात्र रोपाइँ सम्पन्न भएको छ भने बाराको मटिअर्वा क्षेत्रसम्म मात्र पानी पुगेको नारायणी सिँचाइ कार्यालयले जनाएको छ ।
बारा र रौतहटका लागि छुट्याइएको पानी समेत प्रयोग गर्न सकेकाे छैन् । यसले विवाद र असमान वितरणको समस्या पनि सिर्जना गरेको छ । भारतले निर्माण गरी नेपाललाई सन् १९७५ मा हस्तान्तरण गरेको गण्डक नहर प्रणाली नेपालको कृषि उत्पादनमा महत्वपूर्ण योगदान दिन्थ्यो, तर हरेक वर्ष झैँ यस वर्ष पनि सम्झौता पालना नहुनु चिन्ताको विषय बनेको छ । यसरी निरन्तर पानीको आपूर्तिमा देखिएको असमर्थता र सरकारी संयन्त्रको कमजोरीले देशको कृषि प्रणालीमा गम्भीर असर पारेको छ ।
समयमै समाधान नभए आगामी वर्षमा पनि उस्तै समस्या दोहोरिन सक्ने चिन्ता कृषकहरूमा छ ।
भिडियाे सामाग्री
