बाराको कलैया उपमहानगरपालिका अन्तर्गतका विभिन्न वडामा चापाकल सुक्न थालेपछि खानेपानीको अभावले स्थानीयवासी संकटमा परेका छन् । लामो समयदेखि वर्षा नहुनु र खडेरीको प्रभावले चापाकलहरूमा पानी आउन छाडेको हो ।
सबैभन्दा बढी प्रभाव वडा नम्बर १७ को ठुलो ब्रम्हपुरी र सानो ब्रम्हपुरी क्षेत्रमा परेको छ । सो क्षेत्रका अधिकांश चापाकल सुकिसकेका छन् भने बाँकीमा पनि पानी झर्ने क्रम अत्यन्त न्यून छ ।
ठुलो ब्रम्हपुरीमा करिब तीन सय घरधुरी छन् । तीमध्ये अधिकांशको निजी चापाकल पूर्ण रूपमा सुकिसकेको स्थानीय सरोज साहले बताए । “छिमेकीको घरबाट पानी ल्याएर खाना पकाउने, लुगा धोइधुवाइ गर्ने बाध्यता भएको छ,” उनले भने ।
उनका अनुसार, वर्षा हुँदा केही चापाकलमा थोरै पानी आउने गरेको भए पनि पानी नपर्दा पूरै सुक्ने गरेका छन् । कतिपयले मोटर र बाटर पम्पको सहायतामा खेत वा खोला नजिक जानु पर्ने अवस्था आएको छ । बंगरी खोलानजिकका चापाकलमा केही मात्रामा पानी आउँछ भने टाढाका अधिकांश चापाकल सुकेका छन् ।
स्थानीय अजय कुशवाहाका अनुसार कालोपत्रे सडकको पूर्वतर्फका चापाकलमा पानी सुकिसकेको छ भने पश्चिमतर्फका केही चापाकलमा अलिकति पानी आउने गरेको छ । “करिब ११६ फिट गहिराइमा गाडिएका चापाकलसमेत सुक्न थालेका छन्,” कुशवाहाले बताए ।
स्थानीय तहले वैकल्पिक व्यवस्थापन गर्न चासो नदेखाउँदा समस्या दिनप्रतिदिन गम्भीर बन्दै गएको छ । वर्षा नभए ब्रम्हपुरीबासीको जनजीवन थप संकटमा पर्ने देखिन्छ ।
