चार पटक दल परिवर्तन गरेका र भ्रष्टाचारको मुद्दा खेपिरहेका रुपन्देही क्षेत्र नं ४ मर्चवारका दुई पूर्व गाउँपालिका अध्यक्ष शनिबार नेकपा एमाले प्रवेश गरेका छन् ।
सम्मरीमाई गाउँपालिकाका पूर्व अध्यक्ष जितेन्द्रनाथ शुक्ला (बब्लु) र मर्चवारी गाउँपालिकाका पूर्व अध्यक्ष केशवनन्द बनियासहितको समूहलाई मर्चवारको असुरैनामा आयोजित कार्यक्रममा नेकपा एमालेका उपाध्यक्ष एवं अर्थमन्त्री विष्णु पौडेलले पार्टीमा स्वागत गरेका हुन् ।
शुक्ला २०७४ को स्थानीय तह निर्वाचनमा विजय गच्छदार नेतृत्वको मधेसी जनअधिकार फोरम लोकतान्त्रिकबाट अध्यक्ष निर्वाचित भएका थिए। त्यसपछि उनले माओवादी केन्द्रमा प्रवेश गरी २०७९ मा पुनः गाउँपालिका अध्यक्षका उम्मेदवार बने तर पराजित भए । पराजयपछि उनले जनता समाजवादी पार्टी नेपाल हुँदै जनमत पार्टी प्रवेश गरेका थिए। गत आम निर्वाचनमा उनी प्रदेश सभा सदस्यका उम्मेदवार बने पनि पराजित भएका थिए ।
त्यस्तै, मर्चवारी गाउँपालिकाका तत्कालीन अध्यक्ष केशवनन्द बनिया २०७४ मा उपेन्द्र यादव नेतृत्वको पार्टीबाट निर्वाचित भएका थिए । उनले २०७९ मा लोसपाबाट उम्मेदवारी दिए पनि पराजित भए । बनियाविरुद्ध २०७९ चैतमा अख्तियार दुरुपयोग अनुसन्धान आयोगले गैरकानुनी सम्पत्ति आर्जन गरेको आरोपसहित विशेष अदालतमा मुद्दा दायर गरेको थियो ।
अख्तियारको अभियोगअनुसार बनियाले आफ्ना छोराहरूको नाममा जग्गा खरिद, घर निर्माण, अध्ययन खर्च, मोटरसाइकल र ट्र्याक्टर खरिद, बीमामा प्रिमियम तिर्ने, राइस मिलसम्बन्धी कर तिर्ने लगायत विभिन्न खर्च गरी एक करोड ७५ लाखभन्दा बढी सम्पत्ति देखिएको थियो । तर आय स्रोत खुलाउन नसकेको भन्दै ९१ लाख ८६ हजार ५४३ रुपैयाँ ३० पैसा बिगो जफत तथा बराबर जरिवाना असुल गर्न मागदाबी गरिएको छ ।
भिडियाे सामाग्री
