वीरगंज । गृहमन्त्री रमेश लेखकले सीमाक्षेत्रमा हुने अवैध चोरीपैठारी र निकासी रोक्न सम्बन्धित सबै सरोकारवाला निकायलाई आपसी समन्वय र सहकार्य गर्न निर्देशन दिनुभएको छ ।
आज जिल्ला प्रशासन कार्यालय, पर्सामा आयोजित राजस्व चुहावट नियन्त्रण समन्वय समितिको बैठकमा गृहमन्त्री लेखकले स्थानीय प्रशासन, भन्सार कार्यालय, तीनवटै सुरक्षा निकायसहित सम्बन्धित सबै निकायबीच समन्वय गरेर अवैध गतिविधि न्यूनीकरण गर्न जोड दिनुभयो ।
उहाँले भन्नुभयो, “राजस्व चुहावट नियन्त्रणका लागि सबै सरोकारवाला निकायबीच आपसी समन्वय गरेर अघि बढ्नुपर्छ । एक निकायले अर्को निकायलाई दोषारोपण नगरी सहकार्य आवश्यक छ।” गृहमन्त्री लेखकले सीमा क्षेत्रमा हुने अवैध चोरी तस्करी र अन्य आपराधिक गतिविधि न्यूनीकरणका लागि आवश्यक पहल गर्नसमेत अनुरोध गर्नुभयो ।
वीरगंज भन्सार कार्यालयका प्रमुख भन्सार प्रशासक विष्णुप्रसाद ज्ञवालीले अघिल्लो आर्थिक वर्षको तुलनामा गत आर्थिक वर्षमा राजस्व सङ्कलन उत्साहजनक रहेको जानकारी दिनुभयो । उहाँले भन्नुभयो, “अघिल्लो आवको तुलनामा गत आवमा राजस्व सङ्कलन उल्लेखनीय रूपमा बढेको छ। चालु आवमा पनि लक्ष्यअनुसारको सङ्कलन हुने अपेक्षा छ । चोरी तस्करी नियन्त्रणका लागि सम्बद्ध सबै निकायले हातेमालो गरेर अघि बढ्नुपर्नेछ ।”
पथलैयास्थित राजस्व अनुसन्धान कार्यालयका प्रमुख हरिप्रसाद शर्माले सुरक्षा निकायले बिलबिजक बिना तस्करी हुने मालसामानको ओसारपसारलाई रोक्नुपर्ने बताउनुभयो। उहाँले थपे, “भारतीय नागरिकले नेपालका कम आय आर्जन भएका नागरिकको नागरिकताको दुरुपयोग गरी विभिन्न ‘फर्म’ दर्ता गरी तस्करी गर्ने प्रवृत्ति देखिएको छ । राजस्व चुहावट नियन्त्रणका लागि सबै निकायबीच समन्वय आवश्यक छ ।”
पर्साका प्रमुख जिल्ला अधिकारी तोयनारायण सुवेदीले जिल्लाको शान्ति सुरक्षा र राजस्व चुहावट नियन्त्रणमा सम्बन्धित निकायसँग समन्वय गरी अघि बढ्ने प्रतिबद्धता व्यक्त गर्नुभयो ।
नेपाल प्रहरी मधेस प्रदेश प्रमुख उमाप्रसाद चतुरवेदीले भन्सार नाका वरपर गोदाम खोल्ने प्रवृत्तिलाई निरुत्साहित गर्न जरुरी रहेको बताउनुभयो ।
भिडियाे सामाग्री
