यो वर्षको कात्तिक १५ गतेसम्म देशभर विभिन्न प्रकारका चार हजार ५ सय ९७ वटा विपद्जन्य घटना भएका छन् ।
वैशाखयताका ती घटनामा परेर हालसम्म तीन सय ३५ जनाले ज्यान गुमाएका छन् । राष्ट्रिय विपद् जोखिम न्यूनीकरण तथा व्यवस्थापन प्राधिकरणका प्रवक्ता शान्ति महतका अनुसार सो अवधिमा ४१ जना बेपत्ता र एक हजार २६४ जना घाइते भएका छन् । उनका अनुसार बाढीका मात्रै तीन सय १६ घटना हुँदा ३७ जनाको मृत्यु र २७ जना बेपत्ता भएका छन् ।
त्यस्तै, पहिरोका पाँच सय ५० घटनामा ६७ जनाको मृत्यु र चार जना बेपत्ता, चट्याङका तीन सय ५६ घटनामा ४४ जनाको मृत्यु, र सर्पदंशका पाँच सय ३८ घटनामा ९२ जनाको मृत्यु भएको छ । त्यसैगरी, जनावरको आक्रमणका दुई सय ६९ घटनामा २५ जनाको मृत्यु र एक जना बेपत्ता भएका छन् । लेक लागेका ८० घटनामा २७ जनाको मृत्यु, भारी वर्षाका चार सय २० घटनामा सात जनाको मृत्यु, आगलागीका एक हजार ६१४ घटनामा २६ जनाको मृत्यु, र हुरीबतासका दुई सय ८६ घटनामा आठ जनाको मृत्यु भएको प्राधिकरणले जनाएको छ ।
यस्तै, हिउँपहिरोमा परी नौ जना बेपत्ता भएका छन् । प्राधिकरणका अनुसार शनिबार मात्रै देशभर विभिन्न विपद्जन्य ४६ घटना भएका थिए, जसमा दुई जनाको मृत्यु भएको हो ।
ती घटनाले ३१ जिल्ला प्रभावित बनाएको प्राधिकरणले जनाएको छ ।
