सीताराम विवाह पञ्चमीको अवसरमा जनकपुरधामस्थित ऐतिहासिक जानकी मन्दिरमा १ सय ११ मिटर लामो चुनरी अर्पण गरिएको छ ।
बिहान निकालेको भव्य शोभायात्रासँगै उक्त चुनरीलाई माता जानकीलाई विधिवत् रूपमा चढाइएको मन्दिर व्यवस्थापनले जनाएको छ । भारतको गुजरात, सुरतमा रहेको जीन माता ट्रस्टले पठाएको यो विशेष चुनरी जनकपुरधाम आइपुगेपछि सीताराम गौशाला जनकपुरधामका अध्यक्ष मनोज रुंगटाको नेतृत्वमा मन्दिरमा अर्पण गरिएको हो ।
ट्रस्टले विगत केही वर्षदेखि भारत–नेपालका सयौँ मन्दिरमा चुनरी अर्पण गर्दै आएको उल्लेख गर्दै अध्यक्ष रुंगटाले यस वर्ष पनि विवाह पञ्चमीको प्रसङ्गमा श्रद्धा र समर्पणसहित जानकी मन्दिरमा चुनरी चढाइएकाे बताए ।
विवाह पञ्चमी महोत्सवका कारण जनकपुरधाममा हिन्दू परम्परा, सांस्कृतिक झाँकी र भक्ति–भावनाले वातावरण अझै धार्मिक र उत्साहपूर्ण बनेको छ ।
