त्रेतायुगमा भगवान् श्रीराम र माता जानकीको दिव्य विवाह स्मरणार्थ प्रत्येक वर्ष मनाइने साताव्यापी विवाहपञ्चमी महोत्सवमा सहभागी हुन जनकपुरधाममा भीड बाक्लिएको छ ।
नेपालका विभिन्न जिल्लासहित भारतका विविध स्थानबाट आएका हजारौँ भक्तजनका कारण जनकपुरधाम भरिभराउ बनेको छ । बाहिरबाट आएका भक्तजनहरूका लागि जनकपुरका धर्मशाला, होटल, जानकी मन्दिर परिसर तथा बारहबिघा मैदानमा निर्माण गरिएको पण्डालमा आवास व्यवस्था मिलाइएको छ ।
ठूलो संख्यामा भक्तजन आएकाले शहरको मुख्य धार्मिक र ऐतिहासिक क्षेत्रहरूमा बिहानैदेखि चहलपहल बढेको छ ।भीड व्यवस्थापनका लागि धनुषा प्रहरीले विशेष ट्राफिक व्यवस्थापनसहित सुरक्षा नियन्त्रण कडा पारेको जनाएको छ ।मुख्य मार्ग, मेला क्षेत्र तथा परिक्रमा मार्गमा प्रशस्त संख्यामा प्रहरी बल परिचालन गरिएको छ ।
विवाहपञ्चमी महोत्सवलाई लक्षित गर्दै जनकपुरधाममा परिक्रमा क्षेत्रमा माछा–मासु तथा मदिरा बिक्री–वितरणमा जिल्ला प्रशासन कार्यालयले पूर्ण प्रतिबन्ध लगाएको छ । धार्मिक वातावरण सुनिश्चत गर्न स्थानीय निकाय र सुरक्षा निकायले संयुक्त रूपमा निगरानी थालेका छन् ।
महोत्सवमा आन्तरिक तथा बाह्य पर्यटकहरूको चाप बढ्न थालेपछि जनकपुरधामका सम्पूर्ण शैक्षिक संस्था तीन दिनका लागि बन्द गरिएका छन् । केही निजी विद्यालय तथा कलेजहरूले श्रद्धालुहरूको बसोबासका लागि आफ्ना भवन खुला गरेको जनाइएको छ ।
साताव्यापी विवाहपञ्चमी महोत्सवअन्तर्गत आज मटकोर विधि सम्पन्न हुँदैछ । जनकपुरधामस्थित गंगासागर तालमा दिउँसो मटकोर विधि आयोजना गरिने जानकी मन्दिरका छोटे महन्थ रामरोशन दासले जानकारी दिएका छन् । आगामी दिनमा तिलक, बरयात्रा, विवाह र स्वागत समारोहलगायत प्रमुख धार्मिक कार्यक्रमहरू निरन्तर सञ्चालन हुँदै जाने जनाइएको छ ।
