राष्ट्रिय स्वतन्त्र पार्टी (रास्वपा) पर्साले आगामी प्रतिनिधिसभा सदस्य निर्वाचन–२०८४ का लागि समानुपातिक बन्दसूचीका उम्मेदवार छनोट प्रक्रियाबारे विस्तृत जानकारी सार्वजनिक गरेको छ ।
पार्टीका जिल्ला सभापति हरि पन्तले शुक्रबार होटल क्लासिक ब्याङ्केटमा आयोजित पत्रकार सम्मेलनमार्फत उक्त प्रक्रिया औपचारिक रूपमा घोषणा गरेका हुन् । सभापति पन्तका अनुसार उम्मेदवार छनोट प्रणाली पूर्ण रूपमा पारदर्शी, योग्य–आधारित र वैज्ञानिक ढङ्गले सञ्चालन हुनेछ । यसका लागि पार्टीको केन्द्रीय समितिले विस्तृत मापदण्ड तयार पारेको छ ।
“जिम्मेवारी वहन क्षमता, नेतृत्व क्षमता, राजनीतिक निकटता, समावेशीता तथा प्रारम्भिक निर्वाचन (प्राइमरी) अनिवार्यता—यी नै प्रमुख मूल्यांकनका आधार हुनेछन्,” पन्तले भने, उम्मेदवारी चाहने व्यक्तिले अनिवार्य रूपमा नौ वटा प्रमुख योग्यता पूरा गर्नुपर्नेछ—कानुनी रूपमा अयोग्य नठहरिएको, प्रहरी रिपोर्ट स्वच्छ भएको, कालोसूचीमा नपरेको, पारिवारिक दायित्व पूरा गरेको, वैध आम्दानी स्रोत भएको, सम्पत्ति विवरण पेश गरेको, पार्टी अनुशासन समितिबाट दण्ड–निर्णय नपाएको, अन्य दल औपचारिक रूपमा त्यागेको तथा सार्वजनिक पदको दुरुपयोग नगरेको हुनुपर्नेछ ।
“हाम्रो उद्देश्य राष्ट्रिय सार्वभौमिकता, भौगोलिक अखण्डता, संस्कृतिक विविधता, सुशासन, दिगो शान्ति र समृद्धि सुनिश्चित गर्नु हो,” पन्तले भने, “यही लक्ष्यसहित फागुन २१ गते हुने प्रतिनिधिसभा निर्वाचनका लागि तैयारी अघि बढाएका छौँ ।”
कार्यक्रममा पार्टीका केन्द्रीय सदस्य डा. नन्दन यादव, मधेस प्रदेश संगठन विभागका उपप्रमुख प्रमोद कुमार, शिक्षा प्रमुख सबु कडेल, उपप्रमुख सोनालाल पटेल, कोषाध्यक्ष दिलिप प्रसाद कुर्मी, सहसचिव कृष्ण पासवान, पुरुषोत्तम उपाध्याय, मधेस प्रदेश संचार प्रमुख राम सरार्फ, प्रदीप पटेल लगायत स्थानीय नेता तथा कार्यकर्ताहरूको उपस्थिति रहेको थियो ।
