निर्वाचन आयोग नेपाल ले प्रतिनिधिसभा सदस्य निर्वाचनका लागि आजदेखि औपचारिक रूपमा चुनावी प्रचार–प्रसार गर्न पाउने व्यवस्था लागू गरेको छ । आयोगले तोकेको कार्यतालिकाअनुसार राजनीतिक दल तथा उम्मेदवारहरूले आजदेखि फागुन १८ गते राति १२ बजेसम्म प्रचार–प्रसार गर्न सक्नेछन् ।
निर्वाचन आचारसंहिता अनुसार मतदान हुने दिनभन्दा करिब १५ दिनअघि मात्र जुलुस, आमसभा, कोणसभा आयोजना गर्न तथा सञ्चारमाध्यममार्फत निर्वाचनसम्बन्धी सामग्री प्रकाशन वा प्रसारण गर्न पाइने व्यवस्था गरिएको छ ।
आयोगले निर्वाचनको निष्पक्षता, स्वच्छता र विश्वसनीयतालाई उच्च प्राथमिकतामा राख्दै सबै राजनीतिक दल, उम्मेदवार तथा सरोकारवालालाई आचारसंहिताको पूर्ण पालना गर्न निर्देशन दिएको छ ।
कार्यवाहक प्रमुख निर्वाचन आयुक्त रामप्रसाद भण्डारी ले आचारसंहिता उल्लङ्घनप्रति आयोगले शून्य सहनशीलता नीति अपनाएको बताएका छन् । उल्लङ्घन भएमा आयोगले स्पष्टीकरण सोध्ने, आवश्यक परे कानुनी कारबाही गर्ने तथा गम्भीर अवस्थामा उम्मेदवारी खारेजीसम्मको कारबाही हुन सक्ने व्यवस्था रहेको छ ।
निर्वाचन प्रचारका क्रममा दल तथा उम्मेदवारले तोकिएको मापदण्डअनुसार पत्रपत्रिका र अनलाइन सञ्चारमाध्यममा विज्ञापन गर्न सक्नेछन् । साथै आमसभा वा कोणसभा आयोजना गर्दा मञ्च व्यवस्थापन लगायत खर्च विवरण सम्बन्धित निर्वाचन कार्यालयमा बुझाउनुपर्ने व्यवस्था गरिएको छ ।
त्यसैगरी, निर्वाचन अवधिमा कुनै दल वा उम्मेदवारविरुद्ध सामाजिक सञ्जाल वा अनलाइन माध्यममार्फत मिथ्या सूचना, दुष्प्रचार वा द्वेषपूर्ण अभिव्यक्ति फैलाउन नपाइने आयोगले स्पष्ट पारेको छ ।
.jpg-2-1769587845.jpg)
