मेडिकल व्यवसायी दुर्गा प्रसाईंविरुद्ध प्रहरीले सार्वजनिक शान्ति विरुद्धको कसुरमा अनुसन्धान गर्ने भएको छ । राष्ट्र, राष्ट्रियता, धर्म, संस्कृति र नागरिक बचाउ महाअभियानका संयोजक प्रसाईं सोमबार साँझ भक्तपुरबाट पक्राउ परेका हुन् ।
जिल्ला प्रहरी परिसर काठमाडौँका एसपी पवन भट्टराईका अनुसार, प्रसाईंविरुद्ध जिल्ला प्रशासन कार्यालयबाट म्याद लिएर अनुसन्धान गरिनेछ । उनी सरकारसँगको सम्झौता पूरा नभए अनिश्चित कालीन बन्द गर्ने र चुनाव हुन नदिने अभिव्यक्ति दिँदै आएका थिए । साथै, उनी विरुद्ध झुटा अफवाह फैलाउने कसुरमा पनि अनुसन्धान हुने एसपी भट्टराईले जानकारी दिएका छन् ।
यसअघि माघ २३ गते पनि पक्राउ परेका प्रसाईं हाजिर जमानीमा छुटेका थिए । त्यतिबेला निर्वाचनसम्बन्धी उनका अभिव्यक्तिलाई प्रहरीले साइबर ब्युरोमार्फत अनुसन्धानको आधार बनाएर बयान लिएर छाडेको थियो । माघ ५ गते पोखराबाट पनि पक्राउ परेका उनलाई त्यसबेला पनि छोडिएको थियो ।
