गत फागुन २१ गते सम्पन्न प्रतिनिधिसभा सदस्य निर्वाचनपछि संघीय संसद्को पहिलो अधिवेशन आजदेखि प्रारम्भ हुँदैछ ।
सिंहदरबारस्थित निर्माणाधीन संघीय संसद् भवनको बहुउद्देश्यीय कक्षमा आज दिउँसो २ बजेका लागि प्रतिनिधिसभा बैठक आह्वान गरिएको छ । रामचन्द्र पौडेलले यही चैत १६ गते नेपालको संविधानबमोजिम मन्त्रिपरिषद्को सिफारिसमा संघीय संसद्को दुवै सदनको अधिवेशन आह्वान गरेका हुन् ।
बैठकको सुरुवातमा ज्येष्ठ सदस्य अर्जुननरसिंह केसीले अधिवेशन आह्वान सम्बन्धी पत्र पढेर सुनाउने तथा मन्त्रिपरिषद् गठनसम्बन्धी जानकारी दिने कार्यक्रम छ ।
संसद् सचिवालयका प्रवक्ता एकराम गिरीका अनुसार बैठक सञ्चालनका लागि भौतिक, सुरक्षा, प्राविधिक तथा जनशक्तिलगायत सम्पूर्ण तयारी पूरा भइसकेको छ। संघीय संसद्अन्तर्गतको माथिल्लो सभा राष्ट्रियसभाको बैठक भने संसद् सचिवालयस्थित राष्ट्रियसभा कक्षमा बस्नेछ ।
संवैधानिक व्यवस्थाअनुसार प्रतिनिधिसभा निर्वाचनको अन्तिम परिणाम घोषणा भएको ३० दिनभित्र संघीय संसद्को अधिवेशन आह्वान गर्नुपर्ने हुन्छ । निर्वाचन आयोगले चैत ५ गते ‘प्रतिनिधिसभा सदस्य निर्वाचन २०८२’ को अन्तिम प्रतिवेदन राष्ट्रपतिसमक्ष बुझाएको थियो भने नवनिर्वाचित सांसदहरूले चैत १२ गते शपथ ग्रहण गरिसकेका छन् ।
२७५ सदस्यीय प्रतिनिधिसभामा राष्ट्रिय स्वतन्त्र पार्टीका १८२, नेपाली कांग्रेसका ३८, नेकपा एमालेका २५, नेकपा (माओवादी केन्द्र) का १७, श्रम संस्कृति पार्टीका ७, राष्ट्रिय प्रजातन्त्र पार्टी (राप्रपा) का ५ र एक स्वतन्त्र सांसद रहेका छन् ।
शीर्ष नेताहरूले सम्बोधन गर्ने
अधिवेशन प्रारम्भको अवसरमा दलीय आधारमा नेताहरूले मन्तव्य राख्ने कार्यसूची तय भएको छ । संघीय संसद् सचिवालयका महासचिव पद्मप्रसाद पाण्डेयका अनुसार आजको बैठकमा रास्वपा सभापति रवि लामिछाने, एमाले संसदीय दलका नेता रामबहादुर थापा बादल, नेकपा (माओवादी केन्द्र) का नेता पुष्पकमल दाहाल, श्रम संस्कृति पार्टीका हर्क साम्पाङ तथा राप्रपाका ज्ञानबहादुर शाहीले सम्बोधन गर्नेछन् । नेपाली कांग्रेसका तर्फबाट सम्बोधन गर्ने नेताको नाम भने अझै टुंगो लाग्न बाँकी छ।
तीन अध्यादेश पेस हुने
आजको बैठकमा गृहमन्त्री सुधन गुरुङले ‘मतदाता नामावली (पहिलो संशोधन) अध्यादेश, २०८२’, ‘प्रतिनिधिसभा सदस्य निर्वाचन (पहिलो संशोधन) अध्यादेश, २०८२’ र ‘नेपाल विशेष सेवा (दोस्रो संशोधन) अध्यादेश, २०८२’ पेस गर्ने सम्भावित कार्यसूची रहेको छ ।
त्यस्तै, ज्येष्ठ सदस्य केसीले संविधानको धारा १०४ बमोजिम प्रतिनिधिसभाले आफ्नो नियमावली नबनाएसम्मका लागि प्रतिनिधिसभा नियमावली, २०७९ अनुसार कार्य सञ्चालन गर्ने प्रस्ताव पनि प्रस्तुत गर्नेछन् ।
आजको बैठकमा सभामुखको अनुपस्थितिमा बैठकको अध्यक्षता गर्ने सदस्यहरूको मनोनयन गर्ने कार्यसूची समेत रहेको छ ।
सभामुख निर्वाचन तालिका सार्वजनिक हुने
आजकै बैठकबाट सभामुख निर्वाचनको तालिका सार्वजनिक गरिनेछ। सर्वदलीय बैठकले चैत २२ गते सभामुखको निर्वाचन गर्ने सहमति गरिसकेको छ । सोही अनुसार ज्येष्ठ सदस्य केसीले प्रतिनिधिसभा नियमावली, २०७९ को नियम ७ बमोजिम निर्वाचनको मिति घोषणा गर्नेछन् ।
-1772177803.jpg)
