पोखरा महानगरपालिकाले विश्वप्रसिद्ध फेवाताल आसपास क्षेत्रमा बनाइएका अवैध टहरा तथा संरचना हटाउने अभियान सुरु गरेको छ ।
शनिबार बिहानदेखि महानगरपालिकाले डोजर प्रयोग गर्दै तालछेउका टहरा भत्काउने कार्य अघि बढाएको हो । महानगर प्रहरी प्रमुख पुरुषोत्तम थापाका अनुसार हालसम्म ३२ वटा टहरा भत्काइसकिएको छ । उनले नेपाल प्रहरीको समन्वयमा अभियान सञ्चालन गरिएको जानकारी दिँदै ताल अतिक्रमण नियन्त्रणका लागि यो कार्य निरन्तर अघि बढाइने बताए ।
फेवाताल क्षेत्रको संरक्षण तथा सौन्दर्य कायम राख्ने उद्देश्यले विगत लामो समयदेखि अतिक्रमण हटाउन दबाब बढ्दै आएको थियो । पछिल्लो समय नवगठित संघीय सरकारले पनि फेवातालमा भएको अतिक्रमण हटाउने कार्यलाई प्राथमिकतामा राख्दै तीन महिनाभित्र कार्यान्वयन सुरु गर्ने निर्णय गरेको थियो । मन्त्रिपरिषद्ले सार्वजनिक गरेको १०० दिने कार्यसूचीमा समेत फेवाताल संरक्षणको विषय समावेश गरिएको छ ।
पोखरा महानगरपालिकाका मेयर धनराज आचार्यले अदालतको आदेश कार्यान्वयन गर्दै अनधिकृत संरचना हटाइएको स्पष्ट पारे । उनका अनुसार फेवातालको किनाराबाट कम्तीमा ६५ मिटर क्षेत्रभित्र रहेका संरचना हटाउने योजना अनुसार काम अघि बढाइएको हो ।
यसअघि सर्वोच्च अदालतले फेवाताल अतिक्रमण हटाउन स्पष्ट आदेश दिएको थियो । उक्त आदेशपछि केही प्रभावित पक्ष अदालत पुगे पनि अदालतले स्टेअर्डर (अन्तरिम आदेश) जारी नगरेपछि महानगरले अभियानलाई तीव्रता दिएको जनाएको छ ।
स्थानीयवासी तथा सरोकारवालाहरूले फेवातालको संरक्षण दीर्घकालीन रूपमा आवश्यक रहेको बताउँदै अतिक्रमण हटाउने कार्यलाई सकारात्मक रूपमा लिएका छन् । यद्यपि, केही व्यवसायी तथा संरचना धनीहरूले वैकल्पिक व्यवस्थाको माग गर्दै विरोध जनाउने सम्भावना पनि देखिएको छ ।
फेवाताल नेपालकै प्रमुख पर्यटकीय गन्तव्यमध्ये एक भएकाले यसको संरक्षण, स्वच्छता र प्राकृतिक सौन्दर्य जोगाउन यस्तो अभियान अपरिहार्य मानिएको छ ।
महानगरपालिकाले आगामी दिनमा पनि ताल आसपास क्षेत्रमा कडाइका साथ अनुगमन तथा अतिक्रमण नियन्त्रण अभियान जारी राख्ने जनाएको छ ।
-1772177803.jpg)
