पर्साको कालिकामाई गाउँपालिकाले पुराना करार कर्मचारीलाई हटाएर नयाँ भर्ना गर्न सुरु गरेपछि करारका कर्मचारी धर्नामा उत्रिएका छन् ।
मंगलबारदेखि शान्तिपूर्ण धर्नामा बसेका उनीहरूले अध्यक्ष वशिष्टकुमार कलवारले आफ्ना नजिकका व्यक्तिलाई बहाल गर्न पुराना कर्मचारीहरूको म्याद नथपेको आरोप लगाएका छन् । गाउँपालिकाले १० जना करारका कर्मचारीलाई हटाएको छ, जसमा ल्याब असिस्टेन्ट, अनमी, अहेब र गेटपाले छन् ।
तत्कालीन जिल्ला जनस्वास्थ्य कार्यालयबाट नियुक्त भएका यी कर्मचारीहरूलाई स्थानीय तह बनेपछि पनि निरन्तरता दिइएको थियो । वडा नम्बर २ का वडाध्यक्ष सोनालाल चौरसियाले १० जना पुराना कर्मचारीको म्याद नथप्ने अध्यक्षको अडानका कारण पालिकाको परिषद् हालसम्म हुन सकेको छैन ।
करारका कर्मचारीहरूले अध्यक्ष र प्रशासकीय अधिकृत अमित गिरीले पालिकालाई अनिर्णयको बन्दी बनाएको आरोप लगाइरहँदा प्रशासकीय अधिकृत गिरीले यस विषयमा कुनै प्रतिक्रिया दिन चाहेका छैनन् ।
