वीरगंज महानगरपालिकाले नगर क्षेत्रमा सञ्चालन भइरहेका मसाज तथा स्पा सेन्टरहरूको अनुगमन सुरु गरेको छ ।
मसाज सेन्टरको आवरणमा अनियमित तथा अवाञ्छित गतिविधि भइरहेको गुनासो बढेपछि महानगरले नेपाल प्रहरीकाे समन्वयमा संयुक्त अनुगमन थालेको हो । महानगरका नगर प्रहरी इन्चार्ज हरि भुषालका अनुसार भन्सार क्षेत्रबाट सुरु गरिएको अनुगमन क्रमशः महानगरका सबै वडामा स्तार गरिने जनाएकाे छ । अभियानका लागि नगर प्रहरीलाई नेपाल प्रहरीसँग समन्वय गरेर परिचालन गरिएको उनले जानकारी दिए ।
अनुगमनका क्रममा सञ्चालक तथा कर्मचारीको विवरण संकलन गर्नुका साथै नाबालिका प्रयोग भए/नभएको विषयमा निगरानी गरिएको छ । त्यसैगरी व्यवसाय दर्ता, सञ्चालन अनुमति, कर भुक्तानी, सेवा सञ्चालनको स्वरूप तथा निर्धारित मापदण्ड तथा आचारसंहिताको पालना भए/नभएको विषय पनि जानकारी लिने काम भइरहेकाे छ ।
महानगरका अनुसार हालसम्म अनुगमन गरिएका दुईवटा स्पा सेन्टरमा नाबालिका प्रयोग भएको भेटिएको छ । यस्ता गतिविधिमा संलग्न पाइएमा प्रचलित कानुन अनुसार स्पा सञ्चालकलाई कडा कारबाही गरिने वीरगंज महानगरले चेतावनी दिएको छ । नगर प्रहरीले अहिलेसम्म एक दर्जनभन्दा बढी मसाज तथा स्पा सेन्टरको स्थलगत निरीक्षण गरेकाे जनाएको छ । प्रारम्भिक अनुगमनमा केही व्यवसायमा आवश्यक कागजात अपूर्ण रहेको तथा सञ्चालन प्रक्रिया मापदण्डअनुसार नभएको पाइएको छ ।
महानगरपालिकाले नियमविपरीत सञ्चालन हुने तथा गैरकानुनी गतिविधिमा संलग्न व्यवसायमाथि कारबाही प्रक्रिया अघि बढाइने जनाएको छ ।
