बाराको परवानीपुरस्थित राष्ट्रिय पन्छी अनुसन्धान कार्यक्रममा बर्डफ्लु संक्रमण फैलिँदा करिब रु ५० लाख बराबरको क्षति भएको छ ।
अनुसन्धानका लागि पालिएका विभिन्न प्रजातिका पन्छी, अण्डा तथा दाना नष्ट गर्नुपरेपछि कार्यक्रमलाई ठूलो आर्थिक नोक्सानी व्यहोर्नुपरेको हो ।
राष्ट्रिय पन्छी अनुसन्धान कार्यक्रम परवानीपुरका सूचना अधिकारी खमबहादुर प्रजाका अनुसार गत चैत अन्तिम साता टर्की जातको पन्छीमा पहिलो पटक बर्डफ्लु पुष्टि भएको थियो । त्यसपछि फार्ममा पालिएका अन्य प्रजातिका पन्छीमा समेत संक्रमण फैलिँदै गएपछि सम्पूर्ण पन्छी नष्ट गरिएको उहाँले जानकारी दिनुभयो ।
उहाँका अनुसार संक्रमण नियन्त्रणका लागि निर्धारित प्रक्रिया पूरा गर्दै फार्ममा रहेका सबै पन्छी, अण्डा र दाना नष्ट गरिएको हो । बर्डफ्लुका कारण करिब दुई हजार कुखुराका चल्ला, करिब १२ सय गिरीराजलगायत विभिन्न प्रजातिका कुखुरा, ३३ वटा तित्रा, ४७ वटा सेतो तथा कालो टर्की र करिब ४५० वटा बट्टाई नष्ट गरिएको कार्यालयले जनाएको छ ।
त्यस्तै, एल–वान ८३५ किलोग्राम, एल–टु ४५५ किलोग्राम र एल–थ्रि एक हजार ८३५ किलोग्राम दाना पनि नष्ट गरिएको छ । अहिले संक्रमित फार्म क्षेत्रमा चुना छर्किने, मल पुर्ने तथा आगोको ताप प्रयोग गरेर निर्मलीकरण गर्ने काम भइरहेको सूचना अधिकारी प्रजाले बताउनुभयो ।
उहाँले कार्यक्रम पुनः सञ्चालनका लागि आवश्यक तयारी सुरु भइसकेको जानकारी दिँदै पोखरा र नेपालगञ्जस्थित राष्ट्रिय पन्छी अनुसन्धान कार्यक्रमका कार्यालयबाट आवश्यक पन्छी तथा अण्डा ल्याउने प्रक्रिया अगाडि बढाइएको बताउनुभयो ।
