लिमा अधिकारी ले किसानहरूले समयमै आफ्नो उत्पादनको भुक्तानी नपाएको भन्दै सरकारले १५ दिनभित्र अनिवार्य भुक्तानी हुने कानुनी व्यवस्था गर्नुपर्ने माग गरेकी छन् ।
बिहीबार प्रतिनिधिसभा बैठकमा बोल्दै उनले उखु किसान, दूध किसान लगायतका कृषकहरूले वर्षौँसम्म पनि आफ्नो मेहनतको मूल्य नपाउने अवस्था रहेको बताइन् ।
‘हाम्रो कृषि प्रधान देशमा आज किसानको आँशुले माटो भिजिरहेको छ । मकवानपुरका दूध किसानको मात्रै १४ करोड रुपैयाँभन्दा बढी भुक्तानी दिन बाँकी छ,’ उनले भनिन्, ‘यो समस्या एउटा जिल्लाको मात्रै होइन, देशभरका उखु, दूध, धानलगायतका उत्पादक किसानहरूको साझा समस्या हो ।’
सांसद अधिकारीले किसानले समयमै भुक्तानी नपाउँदा घरपरिवार चलाउनसमेत कठिन हुने अवस्था सिर्जना भएको बताइन् । ‘जब एउटा किसानले आफ्नो पसिनाको मूल्य पाउन महिनौँ र वर्षौँ कुर्नुपर्छ, तब उसले गाईभैँसीको दाना र छोराछोरीको स्कुल शुल्क कसरी समयमा तिर्छ ?’ उनले प्रश्न गरिन् ।
उनले कृषि क्षेत्रमा निराशा बढ्दै जाँदा युवाहरू विदेश पलायन हुन बाध्य भइरहेको उल्लेख गरिन् । ‘आज ऊर्जावान युवाहरू आफ्नै उर्वर जमिन बाँझो छाडेर खाडीको मरुभूमि रोज्न बाध्य छन्,’ उनले भनिन्, ‘किसानको खल्ती रित्तो बनाएर देशमा समृद्धि ल्याउन सकिँदैन ।’
सांसद अधिकारीले मुलुकलाई खाद्यान्नमा मात्र होइन, खाद्य आत्मनिर्भरतामा पनि अघि बढाउन आवश्यक नीति तथा कानुनी व्यवस्था गर्न सरकारलाई आग्रह गरिन् ।
उनले किसानको उत्पादनको भुक्तानी १५ दिनभित्र अनिवार्य रूपमा उपलब्ध गराउने कानुनी ग्यारेन्टी गर्न सरकारसँग माग गरेकी छन् ।
