विपक्षी दलहरूको अवरोधपछि सभामुख डोलप्रसाद अर्याल ले प्रधानमन्त्री वालेन्द्र शाह लाई प्रतिनिधिसभा बैठकमा उपस्थित गराउने प्रयास गरेका छन् ।
सभामुख निकट स्रोतका अनुसार बिहीबार सभामुख अर्यालले प्रधानमन्त्री शाहसँग दुई पटक भेट गरी संसद् बैठकमा उपस्थित हुन आग्रह गरेका थिए । तर, प्रधानमन्त्री बैठकमा उपस्थित हुन तयार नभएपछि विपक्षीहरूको नाराबाजी र अवरोधकाबीच सभामुखले बैठक सञ्चालन गरेका हुन् ।
‘उहाँ (सभामुख) ले दुई पटक भेटेर आग्रह गर्नुभयो, तर प्रधानमन्त्री बैठकमा जान तयार हुनुभएन,’ सभामुख निकट स्रोतले जनाएको छ । बिहीबारको प्रतिनिधिसभा बैठकमा प्रधानमन्त्री तथा गृहमन्त्री एवम् विज्ञान, प्रविधि तथा नवप्रवर्तनमन्त्री वालेन्द्र शाहले ‘प्रतिनिधि सभा सदस्य निर्वाचन (पहिलो संशोधन) विधेयक, २०८३ माथि विचार गरियोस्’ भन्ने प्रस्ताव प्रस्तुत गर्ने कार्यसूची रहेको थियो । तर, प्रधानमन्त्री अनुपस्थित भएपछि सभामुख अर्यालले प्रधानमन्त्रीको तर्फबाट कानुन, न्याय तथा संसदीय मामिलामन्त्री सोबिता गौतम लाई उक्त प्रस्ताव प्रस्तुत गर्न समय दिएका थिए ।
यसपछि विपक्षी दलहरूले नीति तथा कार्यक्रम प्रस्तुत भएयतादेखि नै संसद्मा प्रधानमन्त्रीको खोजी भइरहेको स्मरण गराउँदै प्रश्न उठाएका थिए । विपक्षी सांसदहरूले प्रधानमन्त्रीसँग नियमित प्रश्नोत्तर कार्यक्रम समेत सञ्चालन हुन नसकेको अवस्थामा प्रधानमन्त्रीले प्रस्तुत गर्ने कार्यसूची अर्को मन्त्रीमार्फत अघि बढाउन खोजिएको भन्दै आपत्ति जनाएका थिए ।
विपक्षी दलहरूको अवरोध जारी रहेपछि सभामुख अर्यालले केही समयका लागि बैठक स्थगित गरी प्रधानमन्त्री शाहलाई भेट्न पुगेका थिए । तर, त्यसपछि पनि सहमति नजुटेपछि बैठक अवरोधकाबीच नै सञ्चालन गरिएको हो ।
