सिंगापुरमा सम्पन्न एसियन गेम्स पुरुष क्रिकेट छनोट प्रतियोगिताको फाइनलमा नेपालले हङकङलाई डीएलएस (डकवर्थ–लुईस–स्टर्न) पद्धतिअनुसार पराजित गर्दै उपाधि जितेको छ ।
सोमबार भएको फाइनल खेलमा १८९ रनको लक्ष्य पछ्याइरहेको नेपाल ११.३ ओभरमा २ विकेट गुमाएर ११४ रनको बलियो अवस्थामा पुगेका बेला वर्षाले खेल अवरुद्ध भएको थियो । लगातार वर्षा भएपछि खेल पुनः सञ्चालन हुन नसक्दा डीएलएस पद्धतिअनुसार नेपाल विजयी घोषित भएको हो । डीएलएस अनुसार उक्त समयमा नेपालको पार स्कोर ९५ रन रहेको थियो । नेपाल १९ रनले अगाडि रहेकाले उपाधि आफ्नो नाम गर्न सफल भयो ।
नेपालका लागि कुशल भुर्तेलले आक्रामक ब्याटिङ गर्दै ४० बलमा ६५ रन बनाए । कप्तान रोहित पौडेल ३५ रनमा अविजित रहे भने दीपेन्द्रसिंह ऐरी ९ रनमा नटआउट रहे । हङकङका एहसान खान र आयुष शुक्लाले समान १–१ विकेट लिए ।
यसअघि टस हारेर पहिले ब्याटिङ गरेको हङकङले २० ओभरमा ७ विकेट गुमाउँदै १८८ रनको चुनौतीपूर्ण योगफल बनाएको थियो । हङकङका लागि अंशुमन राथले ४५ बलमा ८० रनको उत्कृष्ट इनिङ्स खेले भने शाहिद वासिफले २८ बलमा ५५ रन जोडे । शिव माथुरले २६ रनको योगदान दिए । नेपालका बलरमध्ये शेर मल्ल सर्वाधिक सफल रहे । उनले ४ ओभरमा ३२ रन खर्चेर ४ विकेट लिए । करण केसीले २ तथा सन्दीप लामिछानेले १ विकेट हात पारे । एक समय १८ ओभरमा १७९–५ को अवस्थामा रहेको हङकङले अन्तिम ओभरहरूमा अपेक्षाअनुसार रन जोड्न सकेन ।
फाइनलसम्म आइपुग्दा नेपाल र हङकङ दुवै टोली अपराजित थिए । उपाधिसँगै नेपालले प्रतियोगिताभर उत्कृष्ट प्रदर्शनलाई निरन्तरता दिएको छ ।
