राष्ट्रिय स्वतन्त्र पार्टी (रास्वपा) को प्रथम महाधिवेशनअन्तर्गत ९९ सदस्यीय केन्द्रीय समिति चयनका लागि ३ सय ५५ जनाको उम्मेदवारी परेको छ । उम्मेदवारीको अन्तिम नामावली केहीबेरमै सार्वजनिक गर्ने तयारी भइरहेको केन्द्रीय निर्वाचन आयोगले जनाएको छ ।
निर्वाचन आयोगका अनुसार भूगोल (प्रदेश) तर्फ १ सय ७४ जनाको उम्मेदवारी परेको छ भने खुलातर्फ ८५ र समावेशी समूहअन्तर्गत ९६ जनाले उम्मेदवारी दर्ता गराएका छन् ।
उम्मेदवारहरूमा पार्टीका अधिकांश मन्त्री, सांसद तथा सचिवालय सदस्यहरू समेत रहेका छन् । उम्मेदवारहरूको नाम विवरण मेसिनमा प्रविष्ट गर्न करिब ६ घण्टा लाग्ने आयोगले जनाएको छ । महाधिवेशनअन्तर्गत हिजोदेखि सुरु भएको बन्दसत्रमा करिब चार हजार प्रतिनिधिको सहभागिता रहेको छ ।
निर्वाचन आयोगका अनुसार एक प्रतिनिधिलाई मतदान गर्न औसत १५ मिनेट लाग्ने अनुमान गरिएको छ । मतदानका लागि ८० वटा मेसिनको व्यवस्था गरिएको छ भने विदेशमा रहेका प्रतिनिधिहरूलाई मोबाइल एपमार्फत मतदान गर्ने सुविधा उपलब्ध गराइएको छ ।
एक प्रतिनिधिलाई मतदान गर्न अधिकतम १५ मिनेट लाग्ने अवस्थामा सम्पूर्ण मतदान प्रक्रिया सम्पन्न हुन कम्तीमा ८ देखि १० घण्टा लाग्न सक्ने आयोगको अनुमान छ ।
