बाराको जितपुरसिमरा उपमहानगरपालिका–७ स्थित जितपुर बजारमा शनिबार राति फिल्मी शैलीमा चोरी भएको छ ।
विशाल मार्केट र सिटी मार्केटभित्र रहेका केही पसलमा पसेर चोरहरूले नगद तथा लाखौं रुपैयाँ बराबरका सामान चोरी गर्नुका साथै पसल मै चटपटे र बिर्यानी खाएर फरार भएका छन् । आइतबार बिहान व्यवसायीहरू पसल खोल्न पुग्दा पसलभित्र सामान छरपस्ट भएको र नगद तथा विभिन्न सामग्री चोरी भएको देखेपछि घटनाबारे प्रहरीलाई जानकारी गराएका थिए ।
चोरहरूले पसलको मुख्य ढोका वा ताला नफोडी भवनको छानामा लगाइएको जस्तापाता उप्काएर भित्र प्रवेश गरेका थिए । त्यसपछि विभिन्न पसलबाट नगद, रेडिमेड कपडा, महँगा इनर्जी ड्रिंक्स लगायतका सामग्री चोरी गरी लगेका छन् । घटनालाई अझ रोचक बनाउने पक्ष भने चोरहरूको गतिविधि रहेको छ ।
चोरी कै क्रममा उनीहरूले एउटा चटपटे पसलमा आफैं चटपटे बनाएर खाएको र त्यसपछि नजिकै रहेको बिर्यानी पसलमा प्रवेश गरी बिर्यानी समेत खाएको व्यवसायीहरूले बताएका छन् । उनीहरूले पसलमा रहेका पेय पदार्थ समेत प्रयोग गरेको प्रारम्भिक अनुसन्धानबाट खुलेको छ । आफ्नो पहिचान खुल्न नदिन चोरहरूले अधिकांश पसलमा जडान गरिएका सीसीटीभी क्यामरा भित्ताबाट उखेलेर आफूसँगै लगेको पनि पाइएको छ । यसका कारण घटनाको दृश्य संकलन गर्न प्रहरीलाई थप चुनौती थपिएको छ ।
चोरीबाट भएको क्षतिको यकिन विवरण संकलन भइरहेको प्रहरीले जनाएको छ । प्रारम्भिक अनुमानअनुसार नगदसहित लाखौं रुपैयाँ बराबरका सामान चोरी भएको व्यवसायीहरूको दाबी छ । घटनाको जानकारी प्राप्त भएपछि इलाका प्रहरी कार्यालय जीतपुरको टोली घटनास्थलमा पुगेर अनुसन्धान सुरु गरेको छ । प्रहरीले घटनामा संलग्न व्यक्तिहरूको पहिचान तथा पक्राउका लागि आसपासका क्षेत्रका सीसीटीभी फुटेज, प्राविधिक प्रमाण र अन्य स्रोतहरूको आधारमा अनुसन्धान अघि बढाएको जनाएको छ ।
यस घटनापछि जीतपुर बजारका व्यवसायीहरूले बजार क्षेत्रमा रातिको सुरक्षा व्यवस्था थप प्रभावकारी बनाउन, नियमित प्रहरी गस्ती बढाउन तथा चोरीमा संलग्न समूहलाई शीघ्र पक्राउ गरी कानुनी कारबाही गर्न माग गरेका छन् ।
