प्रतिनिधिसभाको बैठक सुरु हुनेबित्तिकै विपक्षी दलहरूले विरोध जनाएका छन् । त्यसपछि सभामुखले विपक्षी दलका सांसदहरूलाई पालैपालो आफ्नो धारणा राख्ने समय दिएका थिए ।
नेकपा (एमाले) का तर्फबाट बोल्दै प्रतिनिधिसभा सदस्य साजिदा खातुन सिद्धिकीले वर्तमान सरकार जनउत्तरदायी बन्न नसकेको आरोप लगाइन् । सरकारले जनताका आधारभूत समस्या समाधान गर्नुको सट्टा प्रतिशोधको राजनीतिमा केन्द्रित भएको उनको भनाइ थियो ।
सांसद सिद्धिकीले प्रधानमन्त्रीलाई ‘सडकको नभई देशको प्रधानमन्त्री’ बन्न आग्रह गर्दै संसद्को रोष्ट्रमबाट देश र जनताको सम्मानमा सत्य बोल्न चुनौती दिइन् । सरकारले आफ्नो कार्यशैलीमा सुधार नगरे छिट्टै असफल हुने चेतावनीसमेत उनले दिइन् । उनले प्रतिनिधिसभा नियमावलीअनुसार प्रधानमन्त्रीसँग प्रत्यक्ष प्रश्नोत्तर गर्न पाउने व्यवस्थाको प्रभावकारी कार्यान्वयन नभएको भन्दै असन्तुष्टि व्यक्त गरिन् । ‘यो प्रक्रियाले सरकारलाई जवाफदेही, पारदर्शी र बलियो बनाउँछ। तर सरकार सदन र जनताप्रति उत्तरदायी देखिएको छैन,’ उनले भनिन् ।
एमालेका उपाध्यक्ष विष्णु पौडेलमाथि सुर्खेतमा गरिएको व्यवहार तथा सम्पत्ति शुद्धीकरण र ठगीसम्बन्धी अनुसन्धान प्रक्रियाप्रति पनि उनले प्रश्न उठाइन् । पर्याप्त प्रमाणबिनै मानमर्दन गर्ने उद्देश्यले सरकार अघि बढेको आरोप लगाउँदै उनले प्रमाण पुष्टि नभए पौडेलको सम्मान र प्रतिष्ठामा पुगेको क्षतिको जिम्मेवारी कसले लिने भन्दै प्रश्न गरिन् । ‘झुटा विवरण खोज्दै हिँड्ने सरकारको बाटो गलत छ,’ उनले भनिन् ।
सांसद सिद्धिकीले कालापानी, लिपुलेक र सुस्तालगायतका सीमा समस्या अझै समाधान हुन नसकेको उल्लेख गरिन् । सुस्तावासीहरू आफ्ना अधिकारका लागि माइतीघर मण्डलामा आन्दोलन गर्न बाध्य भएको उल्लेख गर्दै प्रधानमन्त्रीले संसद्मा व्यक्त गरेको भनाइ र सुस्ताको वास्तविक अवस्था फरक रहेको उनको दाबी थियो । सरकारले जनताको मौलिक अधिकारको संरक्षण गर्नसमेत असफल भएको उनले आरोप लगाइन् ।
देशको वर्तमान आर्थिक अवस्था, बढ्दो महँगी, करको उच्च दर तथा सेयर बजारमा देखिएका समस्याले सर्वसाधारण त्रसित भएको उनको भनाइ थियो । सरकारले राजस्व सङ्कलन र आर्थिक व्यवस्थापनमा समेत आवश्यक गम्भीरता नदेखाएको आरोप उनले लगाइन् ।
