मासातो कान्डा दुईदिने औपचारिक भ्रमणका लागि नेपाल आएका छन्। एसियाली विकास बैंक (एडीबी) का अध्यक्ष कान्डा आइतबार राति करिब १० बजे काठमाडौं आइपुगेका हुन् ।
घनश्याम उपाध्याय ले त्रिभुवन अन्तर्राष्ट्रिय विमानस्थलमा उनको स्वागत गरेका थिए । भ्रमणका क्रममा कान्डाले सोमबार दिउँसो अर्थमन्त्री डा. स्वर्णीम वाग्ले सँग शिष्टाचार भेटवार्ता गर्ने कार्यक्रम रहेको छ । त्यसपछि उनले एडीबीको सहयोगमा नेपालमा सञ्चालन भइरहेका विभिन्न विकास आयोजनाको स्थलगत निरीक्षण तथा अनुगमन गर्नेछन् ।
मंगलबार उनले प्रधानमन्त्री बालेन्द्र शाह सँग भेट गर्ने कार्यक्रम तय भएको छ । प्रधानमन्त्री बनेपछि बालेन्द्र शाहले औपचारिक रूपमा भेट गर्ने पहिलो विदेशी उच्च अधिकारी कान्डा हुनेछन् । अर्थ मन्त्रालय स्रोतका अनुसार भ्रमणका क्रममा नेपालका लागि एडीबीले उपलब्ध गराउने केही महत्त्वपूर्ण आर्थिक तथा विकास सहयोगसम्बन्धी सम्झौतामा हस्ताक्षर हुने तयारी छ ।
नेपाल आगमनपछि अध्यक्ष कान्डाले सामाजिक सञ्जाल ‘एक्स’ मार्फत आफ्नो भ्रमणबारे प्रतिक्रिया व्यक्त गर्दै नेपाल चुनौतीपूर्ण परिस्थिति र परिवर्तनका विभिन्न चरणबीच पनि उल्लेखनीय रूपमा अघि बढिरहेको बताएका छन् ।
उनले नेपालले पटक–पटक आएका प्राकृतिक विपत्ति, आर्थिक चुनौती तथा राजनीतिक परिवर्तनका बीच असाधारण उत्थानशीलता प्रदर्शन गरेको उल्लेख गर्दै एडीबी नेपालकै सबैभन्दा ठूलो विकास साझेदारका रूपमा ३ अर्ब ९० करोड अमेरिकी डलरभन्दा बढी सक्रिय लगानीमार्फत नेपालको दीर्घकालीन विकासमा सहकार्य गरिरहेको बताएका छन् । उनका अनुसार एडीबीले नेपालको उत्थानशीलतालाई दिगो प्रगतिमा रूपान्तरण गर्न, थप आर्थिक अवसर सिर्जना गर्न तथा दीर्घकालीन आर्थिक वृद्धिको आधार निर्माण गर्न सहयोगलाई निरन्तरता दिनेछ ।
कान्डाले नयाँ सरकारले आफ्ना विकास प्राथमिकताहरू तय गरिरहेको वर्तमान अवस्थामा नेपालको आगामी विकास यात्रामा एडीबीले कसरी अझ प्रभावकारी भूमिका निर्वाह गर्न सक्छ भन्ने विषयमा नेपाल सरकारसँग छलफल गर्ने अवसरका रूपमा आफ्नो भ्रमणलाई लिएको बताएका छन् ।
उनले नेपालसँगको ६ दशकभन्दा लामो साझेदारीलाई अझ सुदृढ बनाउँदै आगामी दिनमा दिगो विकास, पूर्वाधार निर्माण, आर्थिक सुधार र समावेशी विकासका क्षेत्रमा सहकार्य विस्तार गर्ने प्रतिबद्धता समेत व्यक्त गरेका छन् ।
