काठमाडौं । पूर्वप्रधानमन्त्री डा. बाबुराम भट्टराईले मुलुकको आर्थिक विकास र समृद्धिका लागि पुरानो पुस्ताले आफ्नो ज्ञान, अनुभव र सीप नयाँ पुस्तामा हस्तान्तरण गर्दै सहकार्य गर्नुपर्ने बताएका छन् ।
सोमबार काठमाडौंमा आयोजित एक पुस्तक विमोचन कार्यक्रममा बोल्दै उनले विकास र समृद्धिको लक्ष्य हासिल गर्न पुरानो पुस्ताको अनुभव तथा नयाँ पुस्तासँग रहेको विज्ञान र प्रविधिमा आधारित ज्ञानलाई मुलुकका स्रोत–साधनसँग जोडेर प्रभावकारी रूपमा उपयोग गर्नुपर्ने आवश्यकता औँल्याए ।
भट्टराईले पछिल्लो समय आफू राष्ट्रिय स्वतन्त्र पार्टी (रास्वपा) सँग निकट भएको भन्ने चर्चा भइरहे पनि आफूले कुनै नयाँ एजेन्डा नउठाएको स्पष्ट पारे। उनले विगत पाँच दशकदेखि उठाउँदै आएको विकास र समृद्धिको एजेन्डालाई साकार पार्न नयाँ पुस्तासँग सहकार्य गरिरहेको बताए ।
उनले देशको विकास र समृद्धिका लागि सबै राजनीतिक दल र पुस्ताले दलगत स्वार्थभन्दा माथि उठेर काम गर्नुपर्ने धारणा राखे । आफ्नो पुस्तासँग रहेको अनुभव र सीप नयाँ पुस्तामा हस्तान्तरण गर्नुपर्ने तथा नयाँ पुस्तासँग रहेको आधुनिक प्रविधि र ज्ञानलाई देशको हितमा प्रयोग गर्नुपर्नेमा उनले जोड दिए ।
भट्टराईले भने, ‘मैले विगत ५० वर्षदेखि उठाउँदै आएको विकास र समृद्धिको एजेन्डालाई नै अघि बढाउन खोजेको हुँ । हाम्रो पुस्ताले नयाँ पुस्तालाई सहयोग गर्नुपर्छ। हामीसँग भएको ज्ञान र सीप हस्तान्तरण गर्नुपर्छ, र उहाँहरूसँग भएको प्रविधिमा आधारित ज्ञान र सीपलाई देशका स्रोत–साधनसँग जोडेर समृद्ध नेपाल निर्माण गर्नुपर्छ ।’
उनले विज्ञान र प्रविधिको वर्तमान युगमा अधिकारको आन्दोलन केन्द्रित पुराना राजनीतिक संगठनको कार्यशैली प्रभावकारी नहुने दाबी गर्दै समयअनुकूल राजनीतिक सोच र कार्यशैली आवश्यक रहेको पनि बताए ।
