महोत्तरीको बर्दिबास–५ स्थित प्रसिद्ध टुटेश्वरनाथ महादेव मन्दिरमा साउन महिनाको विशेष मेलालाई लक्षित गर्दै सरसफाइ, रङरोगन र सजावटको काम सुरु गरिएको छ ।
‘मधेसको कैलाश’का रूपमा चिनिने यो धार्मिक स्थलमा श्रद्धालुलाई आकर्षित गर्न मन्दिर परिसर तथा आसपासका क्षेत्रमा विशेष तयारी भइरहेको मन्दिर संरक्षण समितिले जनाएको छ । साउन १ गतेदेखि सुरु हुने धार्मिक मेला भदौ १२ गते साउन पूर्णिमासम्म सञ्चालन हुनेछ । साउन महिनामा विशेषगरी सोमबार ठूलो सङ्ख्यामा भक्तजन आउने भएकाले व्यवस्थापनलाई प्राथमिकता दिइएको समितिका अध्यक्ष राजाराम यादवले बताए ।
चुरे क्षेत्रको पहाडी थुम्कामा अवस्थित टुटेश्वरनाथ मन्दिरलाई प्राचीन शिवस्थलका रूपमा धार्मिक आस्थासँग जोडिँदै आएको छ । यहाँ भारतको वैद्यनाथ धामजस्तै ‘नेपालको बाबाधाम’ भनेर समेत श्रद्धालुले मान्ने गरेका छन् ।
पूर्व–पश्चिम राजमार्गको टुटेश्वरचोकबाट करिब आठ किलोमिटर वन क्षेत्र पार गरेपछि पुगिने यस क्षेत्रमा वर्षभरि नै भक्तजन आउने गरेका छन् । माण्डवीगङ्गा नदी किनार, घना वन र प्राकृतिक वातावरणका कारण यो क्षेत्र धार्मिक तथा पर्यटकीय गन्तव्यका रूपमा विकास हुँदै गएको छ ।
मन्दिर संरक्षणका लागि स्थानीय समुदायले लामो समयदेखि पहल गर्दै आएका छन् भने पछिल्लो समय मधेस प्रदेश सरकारले पनि पूर्वाधार विकास र संरक्षणमा सहयोग गर्दै आएको छ । स्थानीयवासीले भने यस क्षेत्रको थप प्रचार–प्रसार र विकासका लागि राज्यको सक्रिय भूमिका आवश्यक रहेको बताएका छन् ।
साउन मेलासँगै महाशिवरात्रि र बालाचतुर्दशीमा पनि यहाँ विशेष धार्मिक मेला लाग्ने गरेको छ । नेपालका विभिन्न प्रदेश तथा भारतका बिहार, झारखण्ड र उत्तर प्रदेशबाट समेत ठूलो सङ्ख्यामा श्रद्धालु दर्शनका लागि आउने गरेका छन् ।
