वीरगंज महानगरपालिका–२५ का वडाध्यक्ष आशुतोष चतुर्वेदीसहित तीन जनालाई प्रहरीले पक्राउ गरेको छ ।
वीरगंजस्थित नारायणी अस्पतालको आकस्मिक कक्षमा भएको तोडफोड तथा चिकित्सकमाथि भएको कुटपिट घटनाको अनुसन्धानका क्रममा प्रहरीले उनीहरूलाई पक्राउ गरेको हो । जिल्ला प्रहरी कार्यालय पर्साका प्रवक्ता तथा सूचना अधिकारी प्रहरी नायब उपरीक्षक चक्रबहादुर मल्लका अनुसार घटनाको अनुसन्धानका लागि वडाध्यक्ष चतुर्वेदीसहित अंकित पटेल र शैलेश पटेललाई नियन्त्रणमा लिइएको हो ।
प्रहरीका अनुसार पक्राउ परेका तीनै जनाविरुद्ध अभद्र व्यवहारसम्बन्धी कसुरमा अनुसन्धान तथा कानुनी प्रक्रिया अघि बढाउने तयारी गरिएको छ । आवश्यक म्याद थपका लागि उनीहरूलाई जिल्ला प्रशासन कार्यालय पर्सामा उपस्थित गराइने प्रहरी नायब उपरीक्षक मल्लले जानकारी दिनुभयो । गत शनिबार नारायणी अस्पतालको आकस्मिक कक्षमा भएको तोडफोड र चिकित्सकमाथि कुटपिटको घटनापछि प्रहरीले संलग्न व्यक्तिहरूको खोजी तथा अनुसन्धान तीव्र बनाएको थियो ।
वडाध्यक्षको रिहाइ माग, आन्दोलनको चेतावनी
यसैबीच, वीरगंज महानगरपालिकाको नगर परिषद् बैठकले पक्राउ परेका वडाध्यक्ष आशुतोष चतुर्वेदीलाई तत्काल रिहा गर्न माग गरेको छ । नगर परिषद्ले जननिर्वाचित प्रतिनिधिलाई पक्राउ गर्नु अन्यायपूर्ण भएको दाबी गर्दै तत्काल रिहाइका लागि सरकार र प्रशासनको ध्यानाकर्षण गराएको छ । वडाध्यक्ष चतुर्वेदीलाई तत्काल रिहा नगरिए चरणबद्ध आन्दोलनका कार्यक्रम घोषणा गर्ने चेतावनीसमेत नगर परिषद्ले दिएको छ ।
वडाध्यक्ष पक्राउ प्रकरणपछि वीरगञ्ज महानगरका जनप्रतिनिधिहरूले विरोध जनाउँदै आएका छन् भने घटनाको निष्पक्ष छानबिन गरी दोषीमाथि कारबाही हुनुपर्ने माग पनि उठिरहेको छ ।
