राष्ट्रिय स्वतन्त्र पार्टी (रास्वपा) पर्साका सभापति एवं प्रतिनिधिसभा सदस्य हरि पन्तले वीरगंजमा बैंकहरूले कमाएको नाफाबाट कर्पोरेट सामाजिक उत्तरदायित्व (सीएसआर) अन्तर्गत छुट्याइने रकम यहीँको समाजको विकासमा खर्च गर्न बैंकका प्रमुखहरूलाई आग्रह गरेका छन् ।
बुधबार साँझ वीरगंजस्थित कन्ट्री इन होटलको सभाकक्षमा ‘क’ वर्गका बैंकका प्रदेश प्रमुख तथा शाखा प्रमुखहरूसँग भएको छलफलमा सांसद पन्तले यस्तो आग्रह गरेका हुन् ।
छलफलका क्रममा पन्तले चुनावअघि र चुनावपछि घरदैलो गर्ने क्रममा स्थानीयस्तरमा थोरै लगानीबाट पनि ठूलो सामाजिक उपलब्धि हासिल गर्न सकिने विभिन्न सम्भावना देखेको बताए । तर, यस्ता सामाजिक कार्यलाई अघि बढाउन आवश्यक स्रोत र कोषको अभाव रहेको उल्लेख गर्दै उनले बैंकहरूको सीएसआर रकमबाट स्थानीयस्तरका सामाजिक काममा सहयोग गर्न आग्रह गरे ।
स्थानीय समाजबाटै व्यवसाय सञ्चालन गरी नाफा आर्जन गर्ने बैंकहरूले सामाजिक उत्तरदायित्वअन्तर्गतको रकम पनि स्थानीय समुदायको आवश्यकता र हितअनुसार खर्च गर्नुपर्ने उनको भनाइ थियो ।
छलफलमा बैंकर्स संघका अध्यक्ष रोहिनी आचार्यलगायत विभिन्न बैंकका प्रदेश तथा शाखा प्रमुखहरूले सीएसआर कोषको रकम निर्धारित क्षेत्रभित्र रहेर सहकार्यका माध्यमबाट सामाजिक क्षेत्रमा खर्च गर्ने प्रतिबद्धता व्यक्त गरेका छन् ।
छलफलमा नेपाल एसबीआई बैंक, सानिमा बैंक, सिद्धार्थ बैंक, नेपाल इन्भेस्टमेन्ट मेगा बैंक, कुमारी बैंक र ग्लोबल आइएमई बैंकका प्रदेश प्रमुखहरू सहभागी थिए। त्यसैगरी प्राइम बैंक, हिमालयन बैंक, नबिल बैंक, एनएमबी बैंक, लक्ष्मी सनराइज बैंक, सिटिजन्स बैंक, एभरेस्ट बैंक, प्रभु बैंक र एनआईसी एसिया बैंकका वीरगञ्जस्थित शाखा प्रमुखहरूको पनि उपस्थिति थियो ।
कृष्ण पासवानले सहजीकरण गरेको छलफलमा रास्वपाका क्षेत्रीय सभापति तेज सम्सेर जबरा, उपसभापति किशोर यादव, सचिव सुदिस प्रजापति, महमादिन आलम र सम्साद आलम सहभागी थिए ।
कर्पोरेट सामाजिक उत्तरदायित्व (सीएसआर) अन्तर्गत संस्थाहरूले सामाजिक, वातावरणीय तथा विकासमूलक क्षेत्रमा योगदान पुर्याउने उद्देश्यले रकम खर्च गर्ने व्यवस्था रहेको छ। स्थानीय आवश्यकता पहिचान गरी यस्तो रकम उपयोग गर्न सके शिक्षा, स्वास्थ्य, खानेपानी, सरसफाइ तथा अन्य सामुदायिक विकासका काममा सहयोग पुग्न सक्छ।
