प्रधानमन्त्री तथा मन्त्रिपरिषद् कार्यालयले संघीय संसदमा सांसदहरूले उठाएका विषयहरूको तत्काल सम्बोधन सुनिश्चित गर्न संसदीय समन्वय संयन्त्र (संसदीय इकाइ)लाई सक्रिय बनाएको छ ।
सांसदहरूले पटक–पटक आफूहरूले सदनमा उठाएका विषयमा सरकारको प्रभावकारी प्रतिक्रिया नआएको गुनासो गर्दै आएका बेला प्रधानमन्त्री कार्यालयले उक्त इकाइलाई थप सक्रिय बनाएको हो ।
प्रधानमन्त्रीको सचिवालयका अनुसार अब सांसदले संसदमा उठाएको विषय सोही दिन सम्बन्धित मन्त्रालय वा निकायमा पठाइनेछ । साथै, उक्त विषयको वर्तमान अवस्था, समाधानका लागि आवश्यक प्रक्रिया तथा सम्बोधन हुन लाग्ने अनुमानित समयसहितको यथार्थ विवरण सम्बन्धित सांसदलाई उपलब्ध गराइने व्यवस्था गरिएको छ ।
प्रधानमन्त्री कार्यालयका अनुसार यस व्यवस्थाले सरकारलाई संसदप्रति थप जवाफदेही बनाउनुका साथै जनप्रतिनिधिहरूले उठाएका जनसरोकारका विषयहरूको प्रभावकारी कार्यान्वयनमा सहयोग पुग्ने विश्वास लिइएको छ ।
